CEBU, Philippines - Nabulabog ang mga langyaw’ng partisipante sa usa ka underwater photography competition diha sa isla sa Olango sa dakbayan sa Lapulapu tungod sa kalit nga paglabay kanila og dinamita sa wala mailhing mga lalaki niadtong Domingo.
Ang maong mga partisipante gilangkoban sa mga Intsik nga mga photographers gikan sa nasud sa China nagdumili sa pagpaila sa ilang mga pangalan gawas lang sa pagtaho sa insidente ngadto sa Tourist Police sa dakbayan sa Lapulapu.
Matud pa sa mga reklamante pipila sa ilang mga kaubanan ang misawom na sa ilawom ug nanguha og mga hulagway sa mga gasang ug uban pang kinabuhi sa dagat dihang miabot ang duha ka lalaking luwan og pumpboat ug miduslit og dinamita ug gilabay sa dagat.
Bisan wala makaigo kanila ang dinamita, nakapasanting kini sa mga dunggan sa mga mi-dive nilang kauban. Sila diha sa ibabaw igo nalang nakugang apan adunay uban nilang kauban nga nangurso sa pagkuha gyud sa mga hulagway sa maong mga lalaki.
Ang mga litrato ilaha nang gihatag ngadto sa kapolisan aron mao na unyay mosubay sa pagkatawo sa maong duha ka mga lalaki. Si Sr. Insp. Junil Kaadlawon mimando na sa iyang mga sakop sa pagsusi sa mga responsableng mananagat.
Ang underwater photography usa ka kompetisyon nga gilangkoban sa 100 ka mga langyaw’ng partisipante ug ang Olango Island nga nabantog na sa mga turista maoy usa sa napiling dapit nga ilang kuhaan og mga hulagway. (BANATNEWS)