CEBU, Philippines - Usa ka job order nga nadestino diha sa buhatan ni Mayor Socrates Fernandez sa dakbayan sa Talisay ang gisikop sa kapolisan tungod sa kasong “grave coercion.”
Si Gemol Borces alyas “Gemoy” Borces taga sitio Kalinaw 2, barangay Tanke sa maong siyudad ang giposasan nila ni SPO3 Frederick Larrobis ug PO3 Arnold Damasco diha sa buhatan sa mayor niadtong Huwebes sa hapon.
Dala sa maong mga polis ang warrant of arrest batok sa suspetsado nga giluwatan ni Municipal Trial Court in Cities (MTCC) Judge Mario Manayon.
Si Susan Bono ang clerk of court sa MTCC sa pakighinabi sa Banat News kagahapon mibutyag nga si kanhi Cebu City Councilor Procopio Fernandez maoy mipasaka og kaso batok kang Borces ug sa mga kauban niini.
Ang ubang mga kauban ni Borces nga nalutsan og warrant sa samang kaso mao sila si Renanto Borces, Peter Borces ug Silvestre Abapo kinsa padayon pang gipangita sa kapolisan.
Matud ni Bono nga “service sentence” na ang upat ug dili na kini makaduso pa og probation ug mapriso sila sulod sa unom ka buwan ug pabayron og P2,000 nga multa matag usa. Ang grupo ni Borces miapelar kaniadto sa korte apan ang korte mipalig-on sa nahauna niining desisyon.
Gikan sa MTCC ang kaso nasang-at kini ngadto sa Regional Trial Court (RTC) sa sala ni Judge Raphael Yrastorza sa Branch 14.
Si Yrastorza miluwat sa iyang desisyon nga si Borces ug mga kauban niini “guilty beyond reasonable doubt.”
Ang grupo ni Borces ang giingong mga sakop sa “cause oriented group” ug giingong magsige og pahigayon og rally diha dapit diin gitukod ang patigayon nga restaurant ni Fernandez sa barangay Tanke.
Si Borces dihang nahinabi kini ni SPO3 Cleopas Bonjoc sa Talisay City detention cell miangkon kini nga kaniadto sakop siya sa Sanlakas apan mibiya na siya sa grupo dihang nakasulod na siya og trabaho sa city hall. (BANAT NEWS)