CEBU, Philippines - Usa ka polis uban sa unom ka tawo ang gipasakaan og kaso kalabot sa suway pagbaligya sa usa ka kinawat nga multicab ngadto sa usa ka dakong opisyal sa kapolisan.
Ang maong polis mao si PO2 Arvin Hernandez nga sakop karon sa Regional Intelligence Division (RID)-7 apan kanhi sakop sa Highway Patrol Group-7 human ang multicab nga iyang gibaligya nasutang kinawat diay.
Lakip sa gipasakaan og kaso mao sila si Nixon Jumao-as nga usa ka ahente og sakyanan,Christian Dela Cruz, Ralph Catulong, Danilo Bataluna taga Lapulapu, Rey Cris Gonzaga taga T. Padilla ug Marlon Lambojon.
Ang HPG-7 misikop nila ni Jumao-as, Dela Cruz, Catulong, Bataluna ug Gonzaga diha sa ilang mga pinuy-anan human moreklamo ang tag-iya sa multicab nga si Felix Enopia, taga barangay Tabunok dakbayan sa Talisay.
Matud pa nga ang maong multicab ibaligya unta ngadto sa hepe sa PNP Regional Crime Laboratory-7 nga si Sr. Supt. Jose Antonio Rodrigo sa kantidad nga P25 mil.
Sumala pa ni Chief Insp. Eduardo Mara, hepe sa Cebu Provincial Highway Patrol Group mibutyag sa mga tigbalita nga bayran na unta sa maong opisyal ang multicab apan ang tag-iya nga si Enopia naatol nga midangop sa HPG-7 ug nasigpatan ang iyang multicab diha sa sulod sa Camp Sotero Cabahug sa dalan Gorordo Avenue.
Apan giilisan na ang plate number niini. Si Enopia sa pakighinabi sa Banat News nagkanayon nga iyang gi-parking ang iyang multicab nga may plakang GTD-788 atubangan sa iyang balay niadtong Lunes sa gabii apan nahanaw na nianang Martes sa kaadlawon.
Pagkabuntag iyang gipaalarma ang iyang multicab ngadto sa City Traffic Operation Managament (Citom) ug Miyerkules miadto siya sa HPG-7 aron i-follow up ang iyang reklamo.
Apan nakurat siya dihang iyang nakita nga gi-parking na ang iyang multicab sa sulod sa maong kampo apan ang plate number KFV-276 na. Sa gihimong imbestigasyon sa HPG-7, si Mara mibutyag nga si PO2 Arvin Hernandez kinsa kanhi nadestino sa HPG-7 ug karon anaa na sa RID-7 maoy giingong mibaligya sa maong multicab kang Sr. Supt. Rodrigo.
Matud pa gi-road test pa ang maong multicab ug nakapaalarma kang Mara nga nailisan gyud dayon ang plaka niini ug narehistro na.
Dugang pa ni Mara dihang ilang gipangutana si Hernandez bahin niini kini mitug-an nga igo ra siyang nangomisyon sa halin sa multicab ug wala siya masayod nga kinawat kini.
Mitug-an hinuon si Hernandez nga gikan ni Jumao-as ang maong multicab ug gipabaligya kini kaniya bugti sa komisyon. Dihang giimbitar si Jumao-as kini mibutyag sa mga pangalan sa ubang mga suspek.
Si Hernandez gikatakdang imbestigahon sa iyang labaw nga si Sr. Supt. Rey Lyndon Lawas lakip sa pasakaan og kasong anti-carnapping act of 1972 uban sa mga suspek.
Matud ni Mara, organisado ang maong grupo tungod kay adunay mokawat, adunay moilis sa plaka ug aduna sad dayoy mobaligya niini.
Sa pakighinabi sa mga tigbalita sa suspek nga si Dela Cruz kini mibutyag nga gipalit niya kini kang Bataluna og P15 mil ug tungod kay paryente sila ni Hernandez iyaha kining gipatabang pagbaligya.
“Wa koy labot ani, usa ko sa BIN (Barangay Intelligence Network) ug asset sa HPG di ko kahimo ani, gani mitabang ko pagdakop ni Bataluna,” matud pang Dela Cruz.
Apan si Bataluna sa iyang bahin mihimakak nga siya maoy mibaligya sa multicab kay gisugo ra siya ni Lambojon nga dad-on kini ngadto kang DelaCruz. (EIM) (BANATNEWS)