CEBU, Philippines - Malaumon si Sr. Supt. Melvin Ramon Buenafe, hepe sa Cebu City Police Office sa tinguha sa kanhi mayor ug karun kongresista sa south district sa dakbayan sa Sugbu nga si Tomas Osmeña nga ipahatag sa kapulisan sa dakbayan sa Sugbu ang mga pisa sa M14 ug M16 rifles nga nasakmit sa Bureau of Customs sa miaging semana.
Nasayran si Osmeña nanawag ngadto kang Customs district collector Ronnie Silvestre ug mihangyong ipahatag sa kapulisan ang nasakmit nga piyesa sa maong mga armas nga gisuwayan unta pagpalusot dinhi gikan sa Estados Unidos.
Si Buenafe nagkanayon nga si Osmeña concerned kaayo sa kapulisan aron mapalapdan ang kampanya batok sa kriminalidad dinhi sa dakbayan sa Sugbu.
Nanghinaot si Buenafe nga matinuod kining plano sa kongresista aron usab madugangan ang ilang mga armas ilabi na sa mga sakop sa Special Weapons and Tactics (SWAT) nga maoy kasagaran nga motubag sa mga dagkong alarma dinhi sa dakbayan.
Giangkon niini nga hangtud karun wala pa makumpleto ang armas sa mga sakop sa SWAT. (BANATNEWS)