CEBU, Philippines - Usa ka suspetsadong carnapper ang nasikop sa kapolisan uban sa mga sakop sa Talisay City Intelligence Bureau (TCIB) didto sa South Coastal Road habig sa barangay San Roque, dakbayan sa Talisay kagahapon sa kaadlawon.
Ang nasikop mao si Gil Donaire Bantayan, 24, taga Terra Dulce, 5th street, White Road, barangay Inayawan, dakbayan sa Sugbo.
Ang mga nakasikop kang Bantayan mao sila si PO1 Gerard Rollon, PO1 Edwin Campomanes ug unom ka mga sakop sa TCIB.
Si Rollon mibutyag nga nasugatan nila si Bantayan nga nagsakay og usa ka motorsiklo ug nahibulong sila nga mikalit kini og liko sa paglikay kanila ug milahos ngadto sa Shell Gasoline Station nga nahimutang sa maong dapit.
Matud ni Rollon nga ila kining gisundan ug samtang nagpatobil og gasolina, nakita sa mga polis nga gitaptapan ang plate number sa motorsiklo ni Bantayan ug papel nga may markang “for registration”.
Gisita sa mga polis si Bantayan ug dihang gitangtang sa suspetsado ang maong papel nasuta nga usa ka temporary plate number nga “7TC-M-8155 ang gitaod niini.
Si Campomanes sa iyang bahin, nagkanayon nga base sa dokumento nga ilang nakita ang tag-iya sa motorsiklo mao si Ariel Gabunada Miranda nga taga sitio Kalubihan, barangay Kalunasan, dakbayan sa Sugbo.
Si Bantayan mipakita og mga dokumento sa motorsiklo apan nagduda ang mga polis nganong gitaptapan sa suspetsado ang plaka niini nga duna man kini mga dokumento.
Si Bantayan nangatarungan nga nagpa-gasolina siya tungod kay gamay nalang ang sulod sa iyang tangke apan nasuta sa mga polis P40 ray nabayran nga gasolina niini kay himabaw mang daan sa gasoline ang tangke niini.
Dihang gikapkapan siya sa mga polis nasakpan ang usa ka walo ka pulgadang kutsilyo nga giluklok niini sa iyang hawak. Gawas niini nakuha pa sa mga polis ang 3 ka t-shirt diin duha niini kolor puwa ug ang usa yellow gikan sa u-box sa motorsiklo, driver’s license sa ngalan ni Philip Gabunada ug swapang riders ID usab ni Gabunada nga nakapasamot sa pagduda sa kapolisan.
Si Bantayan kinsa Student Permit ray lisensya mitug-an sa kapolisan nga iyang uyoan si Gabunada nga maoy tag-iya sa motorsiklo nga iyang gisakyan.
Human ikapahibawo sa kapolisan sa Talisay ngadto sa ubang police station ning dakbayan ang bahin kang Bantayan nga gipaslak nila sa prisohan tungod kay nagdala og motorsiklo nga gidudahan nilang kinarnap niini, miabot dayon kagahapon sa buntag ang kapolisan sa Guadalupe Police Station uban ni Miranda ug miila sa motorsiklo nga iyaha.
Sa pakisusi sa Banat News sa Guadalupe Police Station nasayran nga ang maong motorsiklo giparking ni Miranda sa daplin sa karsada niadtong Lunes sa ala 1:00 sa hapon apan nawagtang kini kay gidagit sa wala hiilhing karnapper, busa gi-report dayon niya ngadto sa Guadalupe Police Station.
Sa laing bahin, usa ka Suzuki multicab nga kolor puwa ug nagtangag sa plakang GTD-788 nga dunay engine number F6A-5685768 ug chasis number nga DD51T-150350 gi-carnap usab niadtong Martes sa ala 1:30 sa kadlawon samtang giparking kini gawas sa balay sa tag-iya nga si Felix Enopia, 37-anyos sa sitio Nonoc, barangay Tabunok, dakbayan sa Talisay.
Si Enopia daling mi-report niini sa kapolisan ug padayon karong gipangita sa mga otoridad sa Talisay ang maong sakyanan. (WC)(BANAT NEWS)