CEBU, Philippines - Wala makatubag si Assistant Director Virginia Santiago sa Office of the Ombudsman Visayas sa pangutana kun makalansar pa ba pag-usab Provincial board Member Thadeo Ouano kun buot siyang magpapili pag-usab sa maong posisyon sa eleksyon sa 2013.
Kini human malig-on ang mando sa pagtangtang kang Ouano gikan sa panerbisyo sa gobiyerno tungod sa iyang pagkalambigit sa kontrobersya sa lamppost. Gawas kang Ouano, gihukman nang matangtang sa ilang trabaho ang 14 ka mga opisyal sa Department of Public Works and Highways (DPWH) .
Hinuon duha niini ang gisentensyahan lang nga masuspenso sa trabaho samtang laing usa ang namatay na. Ang nasuspenso sa trabaho mao sila si Rosalina Denque ug Alfredo Sanchez gumikan sa sala nga neglect of duty o pagpabaya sa katungdanan.
Hinuon ang bahin sa mando sa korte sa pagpatangtang kang Ouano gikan sa serbisyo, wala hatagi og gibug-aton sa hukmanan busa dili siya matangtang gikan sa iyang katungdanan karon.
Apan ang bahin sa mando nga disqualification from service batok ni Ouano mao kini tukionon karon uban sa pangutana kun mahimo pa bang magpapili siya karong umaabot nga election.
Naimplementar ang maong mando sa korte tungod kay wala mosaler ang motion to dismiss nga gisang-at ni Ouano ngadto sa korte.
Si Santiago niining isyuha wala na mohatag og panahom kay alang kaniya ang hukmanan ra maoy makapakanaog og desisyon bahin niini.
Mipasabot usab si Santiago nga kun ugaling nakalingkod na sa pwesto ang politiko nga adunay susamang kaso ug gikinahanglang tangtangon gikan sa serbisyo, gikinahanglan usab nga pito ka adlaw gikan sa iyang pagpanumpa makaduso na kini og quo waranto. Matud pa ni Santiago nga iya nalang isalig sa korte ang tanan tungod kay wala siyay katungod sa pagdesider bahin niining kahimtang ni Ouano.
Samtang mibutyag usab si Santiago nga ang makapugong lang kanila sa pag-implementar sa maong order mao ra ang Temporary Restraining Order (TRO). Ang buhatan ni Mayor Jonas Cortes, Mayor Paz Radaza ug ang buhatan sa DPWH maoy nakadawat sa order diin sila usab ang mo-implementar niini.
Sa gipadalang text message ni Mayor Cortes sa The Freeman mibutyag kini nga “We will respect the order of the court and we will implement their mandate however we will also afford the respondents all the chances to exhaust any legal remedy available to them.”(BANATNEWS)