CEBU, Philippines - Siyam ka mga establisamento sa dalan Juan M. Ceniza sa sitio Superior sa barangay Looc, dakbayan sa Mandaue ang gimandoang manirado.
Si Mandaue City Legal Officer Giovanni Tianero sa iyang pamahayag miingon nga ilang gimando ang pagpatak-op sa maong mga establisamento human masuta nga wala silay mga business permits ug tataw kaayo nga wala kini magbayad og buhis sa lokal nga kagamhanan.
Dugang pa niya nga pipila hinuon kanila nakapakita og business permits ug nagbayad usab og buhis apan napakyas sa pagpakita og mga dokumento nga nagpamatuod nga silay tag-iya sa luna nga ilang giokupar. Nagtuo ang dakbayan nga ang maong luna nga giokupar sa maong mga negosyante iya sa siyudad.
Matud pa ni Tianero nga ang kapakyas sa maong mga establisamento sa pagbayad og buhis maoy rason nga sila patak- opan.
Si Tianero miingon nga nalangan lamang ang paghimo og lakang batok sa maong mga establisamento sanglit gikumpleto pa man nila ang mga dokumento nga gikinahanglan sa pag-ila sa maong mga luna sa maong dakbayan. (BANAT NEWS)