CEBU, Philippines - Mayor sa lungsod sa Barili mipasaka og kaso sa buhatan sa Provincial Prosecutor batok sa usa ka konsehal ug laing duha ka tawo tungod sa pagpamutol og kahoy diha sa munisipyo.
“Cutting of trees is definitely illegal and is against the law,” tipik sa pamahayag sa mayor sa Barili nga si Teresito Mariñas kinsa mipasaka og kasong attempted theft batok nilang Konsehal Hector Helis, Edwin Orosco ug Leo Estrada.
“The cutting of trees is obviously with intent to gain for the reason that the abovementioned culprits did not bother to get permission from the mayor’s office,” matud pa sa reklamo ni Mariñas.
Sa complaint-affidavit sa mayor, mibutyag kini nga nakadawat siya og tawag gikan sa ilang municipal librarian nga si Florence Ngabngaben diin nagpahibalong adunay namutol og kahoy sa likod nga bahin sa municipal library ginamit ang chainsaw niadtong buwan sa Pebrero 15 ning tuiga.
Tungod niini, iyang gimandoan ang Public Information Officer (PIO) nga si Filomeno Leyson Jr. nga ipasusi ang maong report ug nakit-an sa naulahi ang konsehal uban sa Helis ug ang chainsaw operator nga nailhang si Estrada maoy namutol sa mga kahoy.
Si Leyson matud pa ni Mariñas daling misumbong sa kapolisan ug mipa-blotter niini apan sa pagsusi nila ni SPO4 Edward Villaester ug SPO2 Romulo Flores wala na diha ang tulo apan nabiyaan ang pinutol nga kahoy.
“The aforesaid persons who were present during the cutting of trees have no permission from the Office of the Mayor, neither do they have permit to cut trees from the Department of Environment and Natural Resources,” tipik sa reklamo sa Mayor. (BANAT NEWS)