CEBU, Philippines - Sa ikalimang higayon niining tuiga, ang mga operatiba sa Criminal Investigation and Detection Group (CIDG-7) mironda sa gun manufacturer sa dakbayan sa Danao kagahapon sa udto ug nadakpan ang manghimoay ug nasakmit ang mga nagkalain-laing armas.
Si Mario Hermosilla, 45, nadakpan human makuhaan og klase-klaseng armas sulod sa iyang balay ug ang mga kahimanan paggama niini.
Ang narekober nga armas atol sa ronda naglakip sa duha ka Ingram machine pistols, tulo ka .38 revolvers, ug usa ka Black Widow nga nagkantidad og dul-an P50,000.
Ang team sa CIDG-7 gipangulohan ni Chief Inspector Fermin Armendares ug Inspector Delfin Bontuyan armado og search warrant nga giisyu ni Regional Trial Court Judge Marilyn Lagura Yap sa Branch 28, sa dakbayan sa Danao.
Si Sr. Supt. Jose Pante, hepe sa CIDG-7 nagkanayon nga magpadayon ang ilang pagpangronda sa dakbayan sa Danao sanglit ang manghimoay og armas nagpadayon gihapon sa ilang ilegal nga paggama og armas.
Matud ni Pante ang mga dili lisensyadong armas maoy gigamit karun sa mga kriminal.
Sa interbyu sa mga tigbalita, si Hermosilla miangkong manghimoay siya og armas diha sa maong dakbayan apan wala siya’y lisensya niini sulod na sa kapin napulo ka tuig.
Sama sa nauna nang nangadakpan, si Hermosilla wala makatiwas og taas nga edukasyon tungod kay Grade five ra ang nahuman niini ug wala kini laing nahibaw-ang panginabuhian. Mag-atubang siya og kasong kalapasan sa RA 8294, nga illegal possession of unlicensed firearms. (BANATNEWS)