CEBU, Philippines - Gibutyag kagahapon ni Kongresista Jun Alcover sa Alliance For Nationalism and Democracy (ANAD) Partylist nga nakadawat siya og report nga posibleng mo-takeover ang militar pagdumala sa gobiyerno.
Matud pa niya kini mahitabo kung mograbe na ang problema gumikan sa dunay kalibog pagsunod sa konstitusyon nunot sa nahitabong kaguliyang sa kaulohan dihang wala tahura sa Department of Justice ang hukom sa Korte Suprema labot sa pagbiyahe sa gawas sa nasud ni kanhi presidente Gloria Macapagal Arroyo.
Sumala pa ni Alcover nga wala respetoha sa kalihim sa DOJ nga si Leila De Lima tungod sa pagbabag niini kang Arroyo ug sa bana niining si Mike Arroyo, ang kanhi pangulo buot unta molarga sa gawas sa nasud aron magpatambal sa sakit niini.
“Nakadawat ko’g mga report nga dunay pipila ka mga sakop sa militar ang nagplano nga mo-takeover sa gobiyerno kay wala na kaaguwanta sa pamaagi sa administrasyon niini sa wala pagtuman nila sa balaod. Nabalaka ko’g maayo kung mahitabo nang butanga,” sumala pa ni Alcover kinsa nahinabi sa mga sakop sa media sa Cebu City Hall kagahapon.
Gihulagway ni Alcover si De Lima nga mahilig mo-eksena sa media gumikan kay hangtud karon wala pa niini mabuhat ang gipanghambog niini nga pasakaan og kaso si Arroyo. “Nganong dili man niya (De Lima) palargahon si Arroyo, naka-file na diay siya og kaso?,” matud pa ni Alcover.
Dugang pa sa kongresista nga ang gibuhat ni De Lima matawag nga usa ka “Kangaroo Court” nga nagpasabot nga siya ra’y magbuotbuot. Ang Kangaroo Court mao ang tawag sa hukmanan sa mga rebeldeng komunista nga diin maoy kanhi grupo ni Alcover kaniadto.
“Mura na siya og 3-in-1, kay siya’y abogada, huwes ug executor ,” dugang pagsaway sa kongresista.(/EIM) (BANATNEWS)