CEBU, Philippines - Lima ka mga pasahero sa public utility jeepney (PUJ) ang nangaangol ug nalandig sa tambalanan human ang ilang gisakyan nabanggaan sa usa ka sports utility vehicle (SUV) kagahapon sa alas-3 sa kaadlawon diha sa dalan Legaspi ug Lapulapu St., sa barangay Sto. Niño siyudad sa Sugbu.
Si PO3 Dominador Ungab sa Traffic Division sa pakighinabi sa Banat News miila sa lima ka mga biktima nga mao sila si Evelyn Abella, 39, Anne Cabasares, 35, Rosita Orotisano, 56, ug ang magtiayong Banzon nga sila si Eduardo, 60 ug Diana, 57.
Ang PUJ nagtangag sa plakang GWF-666 may rotang Mabolo-Manalili nga gimaneho ni Francisco Bala, 59, gikan sa Mabolo ug paingon sa Manalili diin sakay ang lima ka mga biktima.
Apan sa ilang pag-abot sa maong lugar sa may tunga-tungang bahin sa intersection kalit lang sila gibanggaan sa usa ka Mitsubishi Montero nga nagtangag sa plakang BIS-555 nga gipanag-iya ug gimaneho ni Hansel Chuaseco, 37, nga taga Andres Abellana Extention nga miresulta sa pagkaangol sa lima ka mga biktima ug daling gidala sa Cebu City Medical Center (CCMC).
Hinuon wala ra magdugay ang lima sa maong tambalanan ug gipapauli ra sila sa mga doktor human masutang dili peligro ang ilang kahimtang, luwas usab ang duha ka drayber. (BANAT NEWS)