CEBU, Philippines - Posibleng mag-atubang og imbestigasyon ang napulo ka mga empleyado sa Cebu City Hall nga nadestino sa Department for the Welfare of the Urban Poor (DWUP) gumikan sa ilang pagtambong sa budget hearing diha sa Konseho sa oras tingtrabaho bisan wala kinahanglana ang ilang presensiya.
Si Bise Mayor Joy Augustus Young mipagawas sa mga empleyado sa session hall kagahapon ug gimandoan sila pagbalik sa ilang tagsa-tagsa ka mga trabaho human makuha ang ilang mga pangalan aron ipasa ngadto sa Human Resources Department sa City Hall.
Sumala pa ni Young nga wala siya’y nakitang rason nga motambong pa ang mga empleyado sanglit ang mga department heads maoy gitahasan nga motunga sa budget conference. Ang budget conference nagpadayon gihapon aron sa pagdepensa sa nagkadaiyang departamento alang sa ilang budget karong 2012. (BANAT NEWS)