CEBU, Philippines - Gitakda na sa Disyembre niining tuiga ang hingpit nga pagbalhin sa mga manindahay sa karaang merkado publiko sa dakbayan sa Mandaue ngadto sa bag-ong merkado sa sitio Tribunal sa barangay Centro sa maong dakbayan.
Kini ang gibutyag ni Mosulini Soliva, market administrator sa nahisgotang merkado nga nahinabi sa Banat News kagahapon.
Matud pa niya nga kapin sa 1,000 ka mga manindahay ang gipaabot nga mabalhin ngadto sa ba-ong merkado diin 700 kapin niini maoy karaang mga stall holder sa karaang merkado.
Si Soliva miingon nga ang mga manindahay nga nagtinguha sa pag-angkon og puwesto sa bag-ong merkado padayon na nga naghikay sa mga dokumento alang sa maong katuyoan.
Dugang pa niya nga sa kasamtangan wala sila’y namatikdang misupak sa lakang sa pagpabalhin kanila ngadto sa bag-ong merkado tungod sa kagabok na sa estraktura sa karaang merkado.
Matud pa ni Soliva nga gihatagan nila og unang higayon nga makabaton og puwesto didto sa bag-ong merkado ang mga karaang manindahay sa daang merkado publiko.
Bisan pa man niini sa gihapon ilang gipaningkamutan nga ang tanan nga manindahay makabaton gyud og permanenteng puwesto sa bag-ong merkado, matud pa ni Soliva. (BANAT NEWS)