CEBU, Philippines - Ang mga opisyal sa Filinvest wala makapasalida sa away nila ni Manny Pacquiao ug
Juan Manuel Marquez kagahapon human ipatangtang ang antenna sa ilang cable-tv ni kanhi Capitol consultant Byron Garcia, ang presidente sa homeowners’ association sa Corona Del Mar subdivision sa barangay Pooc, dakbayan sa Talisay.
Si Antonio Lopez, 40, representante sa Filinvest Land Inc. mi-report sa maong insidente ngadto sa Talisay City Police Station.
Si Lopez mipasangil nga si Garcia ug mga kauban nga ilang nailhan sa ngalang “Bulay”, Estekil ug anak ni Mr. Centillas mipakuha sa “dish antenna” sa Cignal Cable TV nga mao untay ilang tan-awan sa sangka ni Pacquiao.
Ang maong antenna gitang-tang gikan sa gitaoran niini ug gidala ni Bulay ngadto sa balay ni Garcia.
Dihang usa sa mga gwardiya sa Filinvest misuway sa pagbadlong kang Bulay mitubag kini (Bulay) nga “don’t worry guard, we are not theft” ug midugang pa kini nga “adto ra ni ipalukat sa balay ni Byron sa taga Cignal”.
Si Lopez mipasangil nga si Byron maoy nangulo sa pagtang-tang sa nahisgutang dish antenna.
Nasayran sa kapolisan nga ang Filinvest maoy nagpataud og antenna sa cable aron unta makapasalida sila live nga away ni Pacman ug Marquez.
Dihang human na mamontar ang antenna miabot ang representante sa Cignal cable nga mao untay mo-program sa cable tv apan nahibulong na kini tungod kay wala na ang antenna.
Si Byron sa iyang bahin, nagkanayon nga ang taga Cignal cable wala mananghid kaniya nga siya man unta ang presidente sa mga homeowners.
Matud ni Garcia nga ang Cignal naglungag sa sementadong bongbong sa clubhouse sa subdivision nga gipanag-iya sa homeowners busa dako kaayo og nahimong kadaot ang gibuhat sa Cignal .
Si Garcia nagkanayon nga ang nahisgutang antenna dili iya sa Filinvest kay iya kini sa Cignal cable.
Dugang ni Byron nga wa siya mahadlok sa pagpa-blotter tungod kay si bisan kinsa adunay katungod nga magpa-blotter ug iyang gihagit ang Cignal nga pakihaon sa korte.
“In every action there is a reaction, mananghid ta kung adunay ibutang,” ni Byron pa. (BANAT NEWS)