Gikang nag-pot session gipatay

CEBU, Philippines - Usa ka lalaki kinsa gituohang gikan sa pot session gipusil patay sa wala hiilhing kriminal didto sa Sitio Casanta, Barangay Mactan, dakbayan sa Lapulapu kagahapon sa kaadlawon.

Ang biktima mao si Roy Aying, 34, nga taga Sitio Soong 1, barangay Mactan sa maong dakbayan.

 Sa imbestigasyon nga gihimo ni SPO1 Manolito Abellanosa nasayran nga sa alas 2:00 kagahapon sa kaadlawon nakadungog og upat ka buto sa armas ang mga residente sa maong dapit apan wala nila kini masusi gumikan sa kahadlok.

 Nianang pagka-alas 5:15 sa kabuntagon mao nay nakita sa mga molupyo sa maong lugar ang nahagba sa yuta nga biktima nga wala nay kinabuhi   busa ila kining gisumbong ngadto sa kapolisan.

Samdan sa ulo ang biktima nga milapos sa iyang dunggan nga maoy   hinungdan sa iyang hinanaling kamatayon.

 Nasuta usab sa kapolisan nga ang armas nga gigamit sa pagpatay sa biktima gikan sa balay ni Jay Malingin.

 Nahibulong usab ang kapolisan kay wala na si Malingin ug ang pamilya niini sa ilang balay hinungdan nga gidudahan kini nga maoy responsabli sa maong krimen.

Sa dihang gihiling sa kapolisan ang bulsa ni Aying sulod sa punerarya nakuha ang usa ka gamay’ng plastic nga adunay sulod nga tulo ka gagmay’ng pakete sa gituhoang shabu. Sa likod usab sa balay ni Malingin adunay usa ka bakanteng lawak nga gidudahang usa ka suyopanan og shabu.

 Gumikan niini nagduda ang kapolisan nga gikang nag-pot session ang biktima uban sa iyang mga higala ug malagmit gihasolan na ang tag-iya sa balay nga si Malingin hinungdan nga kini gipusil. (BANAT NEWS)

Show comments