CEBU, Philippines - Nagtingkagol na sa karsel ang ulitawo nga miunay og sunog sa ilang balay tungod sa away nilang intre-pamilya didto sa Sitio Candupay barangay Kalabawan sa lungsod sa Ginatilan niadtong Domingo sa gabii.
Ang nagpabalhog sa prisohan kang Edgar Emia, 39 ulitawo, mao ang iyang amahan nga si Raymundo Emia, 64, biyudo, ug nagpuyo sa maong lugar.
Si PO1 Robert Dialimas sa Ginatilan Police Station mibutyag sa Banat News nga sa sayo pa ang suspek ug ang manghod niini nga si Cyril, 28, nag-away ug nagsinumbagay, apan puwerting sukoa sa suspek kay gilupig kini sa iyang manghod.
Sa iyang kapungot mikuha siya og gasoline gikan sa tangke sa iyang motorsiklo ug gisablig sa bongbong sa ilang balay dayun giduslitan sa pusporo ug misibi ang mga dapat sa balay hangtud nga abohan nalay nahibilin niini.
Hinuon boluntaryong mitahan ang suspek ngadto sa kapolisan ug samtang nagkagulkol siya mibahad ang iyang amahan ug igsoon nga pasakaan siya og kasong arson. Gibanana-banang mikabat sa P15 mil ang balor sa katibuk-ang balay nga naugdaw. (BANAT NEWS)