CEBU, Philippines - Human sa pila ka bulan nga pagpakahilom subling gialarma ang kontrobersiyal nga anak ni Mayor Socrates Fernandez nga si Joavan human pasanginling nanghulga og traffic enforcer dihang gisitar tungod sa paglapas niini sa lagda sa trapiko pasado alas-10 kagahapon sa buntag.
Ang traffic enforcer nga si Marlorence Monreal, 33, nangluspad nga midangop sa buhatan sa Talisay Police Station ug mireklamo batok sa anak sa mayor.
Sa pakighinabi sa Banat News ni PO3 Roelito Taño, sa Talisay Police Station mibutyag kini nga nangluspad nga midangop sa ilang buhatan si Monreal ug mialegar nga gihulga siyang dad-a’g armalite sa anak sa mayor dihang iyang gisitar.
Matud pa ni Taño base sa pamahayag ni Monreal, ang batan-ong Fernandez sakay sa usa ka puti nga BMW gikan sa amihanan nga wala mohunong bisan stop ang signal sa traffic lights diha sa eskina sa Tabunok padulong sa barangay San Isidro tupad sa usa ka dakong mall.
Gikatahong unang nasigpatan si Joavan nga diha misubay sa left lane nga maoy pwesto sa mga sakyanan padulong sa wala apan pag-abot sa maong eskina kalit kining mi-change lane ug mitapon sa tuo ug mipaturatoy og padagan lahos sa habagatan bisan og ‘stop’ pa ang signal sa tuo nga lane.
Tungod niini gisuwayan og babag ni Monreal ang maong awto apan wala kini momenor ug diriyot siyang maligsi hinungdan nga iyaha kining gigukod ug dihang naabtan niya sa flyover sa Tabunok mikanaog ang drayber niini ug nakugang siya nga si Joavan ang sakay.
Apan samot ang iyang kakugang dihang giingnan siya niini nga ipataktak siya sa iyang trabaho ug dihang wala siya mobiya ni Joavan gihulga hinuon siya niini sa pag-ingon: “Unsa man dili mo mohawa diha kay mobalik ko armalayton ta mo diha?”
Tungod sa kahadlok ni Monreal nga tinud-on ni Joavan ang bahad dali siyang misumbong sa kapolisan.
Matud pa ni Taño nga ilaha untang isakay si Monreal sa patrolcar aron sikupon si Joavan apan gihulagway ni Taño nga daw wala kini planong mosang-at og pormal nga reklamo ug igo lang kini nga nagpa-blotter.
Sa report sa DyAB ni Marlon Belleta, si Mayor Socrates Fernandez wala una mikomento sa nahitabo karun sa iyang anak nga si Joavan ug iyang giklaro nga unya na siya mokomento kun iyang madungog ang estorya sa duha ka habig.
Ang Banat News misuway sa pagkontak sa habig unta ni Joavan apan dili kini motubag kun tawagan. (BANATNEWS)