CEBU, Philippines - Miluwat na kagahapon sa hapon sa ilang affidavit ang duha ka mga witness sa pagpusil patay sa usa ka negosyanteng lalaking Maranao nga gipatay niadtong nakalabay Nobiyembre uno diha sa Tabunok sa dakbayan sa Talisay.
Ang maong pagpamusil nahitabo ilawom sa flyover sa barangay Tabunok, dakbayan sa Talisay kinsa ang biktima mao si Sony Saumay ug namaligya og mga sunglasses ang biktima.
Ang suspetsado ug giingong triggerman sa maong pagpamusil mao si Jonabel Nacario Lopez kinsa nasikop usab dayon sa gipahigayong hot pursuit operation sa kapolisan. Si Lopez nagdumili sa pagtug-an kabahin sa duha ka mga wala mailhing lalaki nga iyang giingong mga kuyog sa pagpamusil.
Si Superintendent Eddie Recamara, hepe sa Talisay City Police Station nga nahinabi sa Banat News kagahapon nagkanayon nga kagahapon sa hapon mianha sa ilang buhatan ang duha ka mga witness sa hitabo ug miluwat sa ilang affidavit.
Matud ni Recamara nga karong adlawa (Biyernes) gikatakda ang pagpasaka og kasong murder ug kalapasan sa Akta Republika 9165 kon “Comprehensive Dangerous Drugs Act Law” batok kang Lopez diha sa piskaliya sa Talisay.
Si Lopez naembargohan sa mga polis og unom ka paketeng shabu nga gisulod sa iyang pitaka. Apan wala na makuha pa ang armas. Sa unang report, si Lopez giingong nanimalos sa biktima sanglit kabanay niini ang mipatay sa iyang igsuon kaniadto. (BANATNEWS)