CEBU, Philippines - Gisumbalik og pagpasaka og kaso sa igsuon sa gobernador nga si Byron Garcia ang Firearms Explosive Security Agencies and Guards Supervisory Section (FESAGSS) tungod sa giingong pagkumpiskar sa iyang armas nga walay ‘due process.’
Ang gipasakaan og kaso ni Garcia mao ang hepe sa FESAGSS-7 nga si Supt. Rex Derilo ngadto sa Ombudsman-Visayas nga ‘coercion,dishonesty ug illegal confiscation of a licensed gun.
Si Garcia kinsa igsuon ni Gobernador Gwendolyn Garcia mipasangil kang Derilo nga wala siya hatagi og due process sa maong opisyal pagkumpiskar sa iyang armas.
Si Garcia nagkanayon nga wala niya boluntaryong gitahan ang iyang high-powered nga armas ngadto sa mga awtoridad ilegal kining gikuha gikan sa iyang balay.
Matud ni Garcia nga si Derilo uban sa laing polis ug opisyal sa barangay miadto sa iyang balay aron husayon ang isyu diha sa ilang subdivision sa Corona Del Mar sa barangay Pooc, Talisay.
Si Garcia nagkanayon usab sa iyang reklamo nga iyahang gipahibalo si Derilo nga duna siyay lisensiya sa pagdala og high-powered nga armas apan giingnan siya ni Derilo nga kinahanglang i-verify pa kini ngadto sa ilang buhatan pagtino kung tampered ba kini o dili.
Tungod niini mituman si Garcia sa hangyo sa polis. Apan pag-abot sa FESSAGS giingong gikumpiskar kini ni Derilo nga walay ‘due process’ ug bisan na gani sa temporary receipt nga giisyu ngadto kaniya walay gisuwat nga “voluntary surrendered firearms.”
Sa reklamo ni Garcia nagkanayon kini nga si Derilo namakak sa gisulti niini sa media nga boluntaryo niyang gi-surrender ang iyang armas.
Nahimong isyu ang pagdala-dala og armas ni Garcia human kini pasanginling nagbitbit og AK-47 ug gipakita niya kini ngadto sa usa ka American national nga si Wyne Morris nga homeowner usab sa Corona Del Mar nga iyang gikabangi.
Si Garcia midugang nga ang kapitan sa Pooc nga si Dorotheo Emit makatestigo pabor kaniya nga wala niya boluntaryong gitahan ang iyang armas.
Sayo pa si Derilo nagkanayon ngadto sa mga sakop sa media nga si Garcia boluntaryong mitahan sa maong armas ngadto sa FESAGSS tungod kay nasabtan niini nga aduna siyay nahimong kalapasan sa paghupot niini.
Kini tungod kay walay “Permit to Carry Firearms Outside of Residence (PTCFOR) si Garcia maong mirekomendar kini nga i-revoke ang lisensiya ni Garcia.
Si Derilo dihang gikuhaan sa Banat News og pamahayag sa telepono nagkanayon nga ‘expected’ na niyang sumbalikon sila og kiha ni Garcia apan masaligon siyang malimpyohan ang ilang pangalan ug miklarong walay personal nga interes ang ilang buhatan kang Garcia sanglit wala silay makuha gikan niini. - BANAT NEWS