CEBU, Philippines - Usa ang namatay ug laing usa ang talandugon ang kahimtang human ang motorsiklong ilang giluwanan gikasungag ang usa ka pribadong sakyanan alas-12 pasado ang takna sa miaging tungang gabii sa sitio San Vicente sa barangay Jubay sa lungsod sa Liloan.
Ang namatay mao si Federico Barutog Jr., 25, taga sitio Pusok Semento sa barangay Pusok, dakbayan sa Lapulapu ug ang backrider niini nga wala pa mailhi atol ning pagsulat sa balita talandugon pa ang kahimtang.
Ang gikabangga sa duha mao ang usa ka closed-type nga Kia van nga nagdala sa plakang YHR 658 nga gimaneho ni Eric Lumungsod, 33, taga barangay Gairan sa dakbayan sa Bogo.
Si PO3 Rutchele Jugalbot sa kapolisan sa nahisgutang lungsod nga nahinabi sa Banat News miingon nga kusog nga nagdagan paingon sa habagatang bahin ang motorsiklo sa mga biktima ug paghidangat sa maong dalan nasungag niini ang maong van nga paingon sa amihanan.
Matud pa ni Jugalbot nga milupad ang duha ka biktima tungod sa kakusog sa impact sa panagsungag ug nadakdak sila sa sementadong karsada.
Ang mga biktima gidala sa Vicente Sotto Memorial Medical Center sa dakbayan sa Sugbo apan si Dr. Emiraldo Gamillo mideklarar sa drayber sa motorsiklo nga si Barutog nga patay na paghidangat ngadto kanila.
Si Jugalbot miingon nga ilang gipaabot ang mga kabanay sa naangol nga backrider sa namatay kinsa padayong giatiman sa maong tambalanan.
Matud pa ni Jugalbot nga ang drayber sa van nga gikabangga sa duha gibalhog na sa karsel ug gikatakdang pasakaan og kaso. - EIM (BANAT NEWS)