CEBU, Philippines - Mokabat sa P1.2 milyones ang kantidad nga gikaon sa kalayo sa nahitabong sunog kagahapon sa alas- 4 kaadlawon sa Maria Luisa Village barangay Talamban ning dakbayan.
Ang dos andanas nga panimalay sa negosyanteng si Nicolas Ting apan giokupar na kini karon sa pamilya ni Mandaue City Councilor Emmarie “Lolypop” Ouano-Dizon ug banang si Jojo Dizon ang kalit lang nga nasunog nga gituohang nagsugod diha sa sala niini nga mikatap sa tibuok panimalay.
Sa pakighinabi sa Banat News ni Cebu City Fire Department Fire Marshall Aderson Comar mibutyag kini nga sa ilang inisyal nga impormasyong nakuha adunay gihimong ‘get together’ (salo-salo) sa wala pa masunog ang panimalay sa negosyante.
Walay bisan usa sa mga pamilya ang nakabantay sa sinugdanan sa sunog sanglit nakatulog silang tanan atol sa hitabo ug nakabantay nalang nga dako na ang kalayo.
Matud pa ni Comar nga ang sunog diha sa sala mikaon sa tanang butang nga ginama sa light materials.
Ang maong sunog giisa ngadto na sa general alarm ug swerteng pulos luwas nga nakagawas sa panimalay ang mga okupante ug nakontrolar kini sulod lang sa lima ka minutos.
Butyag usab ni Comar nga ila pa karun nga gi-imbestigar kun unsay hinungdan niini apan adunay mga pagdudang posibleng electrical ang hinungdan nga susihon pa sa kabomberuhan.
Ang usa sa mga anak ni Ting nga si Nino Ting mibutyag nga posibleng usa sa mga appliances nga ilang gigamit sa ilang salosalo ang wala maibot tungod sa kalapoy na sa ilang lawas ug nakamata nalang sila sa kabaga na sa aso.
Hinuon nasalbar sa banay ang ilang mga sakyanan ug ubang mga gamit gawas lang sa ilang mga sinina ug ang mga cellphones sa magtiayong Dizon. - Lesley Caminade-Vestil ug Flor Perolina sa The Freeman/EIM (BANAT NEWS)