CEBU, Philippines - Ang batan-ong first councilor sa dakbayan sa Talisay nga si Eduardo “Digul” Gullas III mihulagway nga usa ka lisod apan dakong hagit ang pagkahimo niya karong acting Vice Mayor.
“I find it challenging. Basically, I’m still learning the ropes as a councilor, and now, I’m the acting Vice Mayor. But I’m glad my fellow councilors are helping me. So, I think I’ll manage,” matud sa batan-ong Gullas.
Si Bise Mayor Alan Bucao ang mi-leave kini niadtong Octubre 19, 2011 ug namakasyon uban sa iyang pamilya ngadto sa Amerika ug isip first councilor si Gullas ang temporaryong mipuli kaniya.
Si Bucao giingong mobalik karong Nobiyembre 12, 2011diin buot pasabot niini si Gullas mao pay mo-preside sa duha pa ka mga sesyon sa konseho.
Si Gullas kinsa apo ni Kongresista Eduardo Gullas sa unang distrito sa lalawigan sa Sugbo nagkanayon nga nangandam na siya sa iyang kaugalingon alang sa umaabot nga duha ka sesyon.
Hinuon si Gullas kinsa maoy labing batang konsehal nangayo kini og tabang sa ubang mga konsehal sa siyudad kinsa maguwang kaayo niya og pangidaron ug mga beterano na sa pagserbisyo sa Talisay.
Ang batan-ong Gullas gipaningot kini dihang milingkod isip presiding officer sulod sa 20-minutos sa milabay’ng sesyon sa konseho niadtong Martes.
Gawas nga presiding officer, isip acting Vice Mayor si Gullas ang temporaryong mangako sa responsibilidad o obligasyon ni Bucao.(EIM) (BANAT NEWS)