CEBU, Philippines - Patay nang miabot sa tambalanan ang usa ka 13 anyos nga batang lalaki human kini pusila sulod sa bilyaran sa Brgy. Cansaga lungsod sa Consolacion kagahapon sa kaadlawon.
Ang biktima mao si Jade Emnace, 13, wala na magtungha ug residente sa Purok 4, Brgy. Nangka sa maong lungsod.
Samtang ang gitumbok nga suspetsado mao si Junjun (tinood ngan gitago) usa ka 17 anyos nga silingan usab sa biktima.
Base sa pamahayag ni PO3 Efren Fuentes ang Desk Officer sa Consolacion Police Station, base sa imbestigasyon nga gipahigayon ni SPO3 Roy Susvilla nasuta nga sa mga alas 4:50 kagahapon sa kaadlawon sulod sa usa ka bilyaran nagkalalis si Emnace ug ang 17 anyos nga suspetsado.
Nagduda ang kapolisan nga gumikan sa pusta ang hinungdan sa maong panaglalis ug wala makabantay si Emnace nga mibunot og armas ang suspetsado dayong pusil patay kaniya.
Si Emnace nga samaran sa dughan dali nga gihatod sa kabanay ngadto sa Eversely Child Sanitarium hospital apan gideklarar kini nga patay na sa paghiabot didto pinaagi sa mga mananambal.
Kasong murder ang kasong ipasaka batok sa suspek kinsa gipangita pa karon sa kapolisan human mosibat . Nila ni Bong Soriano, Darrel Carumba ug Romeo T. Limpangog/WC