CEBU, Philippines - Ang kapolisan sa dakbayan sa Talisay andam na sa ilang security plan sa umaabot nga kalag-kalag diin adunay ibutang nga mga police assistance center sa matag sam-ang sa siyudad.
Kini maoy gibutyag sa hepe sa Talisay City Police Station nga si Superintendent Eddie Recamara.
Ang siyudad adunay lima ka sam-ang diin duha niini mga pribado ug ang tulo pampubliko.
Ang mga pribadong sam-ang mao ang Cebu South Memorial Garden nga nahimutang sa barangay Mohon ug Evergreen nga nahimutang sa Cebu South Coastal Road habig sa barangay Tanke. Ang tulo ka mga pampublikong sam-ang nahimutang diha sa barangay Poblacion, Cansojong ug Tanke.
Si Recamara nga nahinabi sa Banat News kagahapon nagkanayon nga sugod sa Oktubre 31, 2011 sa gabii aduna siya’y ibutang nga police assistance center sa may entrada sa matag sam-ang diin adunay mga barangay tanod nga motabang sa kapolisan.
Ang mga mosulod sa sam-ang kapkapan ug hilngon ang sulod sa mga bag pagsiguro nga walay makadala og mga hinagiban, ilimnong makahubog, baraha ug uban pang mga gamit sa sugal ngadto sa sulod sa sam-ang.
Gawas niini adunay mga polis usab ang mag-roving sulod sa matag sam-ang aron pagsikop sa mga badlongon.
Matud sa hepe nga atol sa kalag-kalag kinahanglan nga ang mga moduaw sa mga lubong , imbes nga mag-inom, magsugal o magsaba-saba mohatag og respeto ngadto sa mga mitaliwan na nilang mga minahal sa kinabuhi ug mag-ampo alang sa mga kalag niini.
Matud usab ni Recamara nga aduna silay ibitay nga mga tarpaulin sa gawas sa sam-ang sa mga “DOs and DONTs” o mga gidili ug wala idili.
Ang ilimnong makahubog gidili nga itinda sa mga vendor sa dapit duol sa mga sam-ang. Ang provincial headquarter adunay ipadala nga augmentation o dugang nga mga polis atol sa maong adlaw.
Si Recamara nanawagan sa publiko nga kanunay’ng magmabinantayon nga kadtong moadto sa mga sam-ang dili magdala og sobrang kwarta, dili magsul-ob og mga mahalong alahas aron dili sila mabiktima sa mga kawatan.
Gawas usab niini ang mga balay siguradohong sirado, ang mga naka-plug nga appliance tangtangon gikan sa outlet aron paglikay sa sunog o ba kaha dili maghurot og suroy ngadto sa sam-ang aron adunay makabantay sa balay ug dili masudlan og kawatan ug malikayan ang uban pang mga insidente. - BANAT NEWS