CEBU, Philippines - Ang Cebu City Police Office (CCPO) ug City Traffic Operation Management (CITOM) mipahibalo sa publiko kabahin sa traffic rerouting sa kadalanan sa siyudad atol sa pagsaulog sa Kalag-kalag.
Ang traffic rerouting iimplementar gikan sa Oktubre 30, 2011 ngadto sa Nobiyembre 2, 2011. Ang mga karsada duol sa mga sementeryo maoy maapektohan sa maong rerouting. Sa barangay Pardo, atol sa nahisgutang mga adlaw ang mga sakyanan dili paagion sa Dela Victoria street ug Sabellano road nga nagpaingon ngadto sa sementeryo aron mahatagan og agianan ang pedestrian nga moduaw sa mga lubong sa ilang minahal sa kinabuhi.
Ang designated nga parking area sa mga sakyanan mao ang sitio Lusimba paingon ngadto sa Dela Victoria street. Ang loading ug unloading area mao ang Tabura street.
Sa barangay Labangon, ang tanang sakyanan nga maggikan sa Katipunan street, kinahanglang moagi sa dalan A. Lopez, dayon moliko sa wala paingon sa dalan Balaga ug moliko sa tuo ngadto sa Tranza road ug molusot ngadto sa dalan Katipunan. Ang designated parking area mao ang Don Sergio Osmeña School ug ang loading ug unloading area mao usab ang Balagon o Balaga road.
Sa barangay Calamba, ang tanang sakyanan nga mopaingon ngadto sa sementeryo sa nahisgutang lugar nga moagi sa V. Rama Avenue mao lang gihapon ang dagan niini sama sa naandan apan walay tugotan nga maka-parking duol sa menteryohan sa may V. Rama Avenue.
Atol sa Kalag-kalag ang mga tartanilya dili tugotan nga moagi sa V. Rama Avenue kay palikuon sila sa tuo paingon ngadto sa dalan Alcantara dayon balik sa ilang destinasyon.
Ang designated parking area mao ang V. Rama Avenue layo sa gate sa sementeryo.
Ang loading ug unloading area sa V. Rama Avenue lapas sa Lucio Drive paingon ngadto sa N. Bacalso Avenue.
Sa barangay Talamban, ang tanang sakyanan gikan sa downtown area nga mopaingon ngadto sa Talamban proper kinahanglang adto moagi sa dalan Borbajo dayon moliko sa wala paingon ngadto sa dalan SOS ug moliko na usab sa wala o tuo ngadto sa dalan Miñoza dayon ngadto na sa ilang destinasyon.
Ang tanang sakyanan nga naggikan sa Pit-os kinahanglan nga moagi sa dalan Miñoza paingon ngadto sa downtown proper. Ang designated parking area mao ang dalan Miñoza gikan sa dalan Borbajo. Ang loading ug unloading area mao ang kilid sa sementeryo dapit sa dalan Miñoza.
Sa Cempark, ang tanang sa mga sakyanan gawas sa mga truck ug trailer nga gikan sa downtown area nga moagi sa Governor Cuenco Avenue paingon sa Cempark Cemetery kinahanglan nga anha moagi sa tuo nga habig sa karsada dayon moliko ngadto sa tuo paingon sa dalan J. Panis (dalan paingon na ngadto sa Cempark Cemetery) dayon exit o mogawas ngadto sa gate sa dalan A.S. Fortuna o sa exit gate sa dalan Orel paingon ngadto sa dakbayan sa Mandaue.
Ang designated nga parking area mao ang Gaisano Country Mall (bowling lane) ug ang loading ug unloading area mao ang dalan J. Panis gikan sa gate sa Cempark ngadto sa Governor Cuenco Avenue.
Sa mga sementeryo sa Old San Miguel, Carreta, Doña Pepang, Chinese, Ludo ug Queen City Garden, ang tanang mga pasaheroang sakyanan nga moagi sa Mabolo kinahanglang moliko sa wala paingon ngadto sa Juan Luna Avenue, dayon liko sa tuo ngadto sa S. Osmeña Avenue, liko sa tuo ngadto sa dalan General Maxilom Avenue, liko na usab sa tuo ngadto sa dalan J.C. de Veyra, liko sa wala ngadto sa Juan Luna Avenue, liko sa tuo ngadto sa M.J. Cuenco Avenue, ug balik ngadto sa ilang naandang rota paingon sa ilang point of origin o gigikanan.
Ang mga jeep pasaheroan gikan sa Consolacion, Lilo-an, Compostela, Danao, Carmen ug MEPZA sa dakbayan sa Lapu-Lapu adto moagi sa dalan Urot dayon moliko sa tuo ngadto sa dalan Cabahug paingon ngadto sa dalan sa A. Soriano Avenue, liko sa wala ngadto sa Juan Luna Avenue, liko sa tuo ngadto sa S. Osmeña Avenue, liko sa tuo ngadto sa General Maxilom Avenue, liko sa tuo ngadto sa dalan J.C. de Veyra, liko sa wala ngadto sa 6th street, liko sa wala ngadto sa dalan de Veyra, liko na usab sa wala ngadto sa Juan Luna Avenue, liko sa tuo ngadto sa A. Soriano Avenue ug dayon ngadto sa ilang naandan nga rota paingon ngadto sa ilang point of origin.
Ang tanang jeep pasaheroan gikan sa south area nga moagi sa dalan Benedicto kinahanglan nga molahos ngadto sa dalan JC de Veyra o moliko sa wala ngadto sa General Maxilom Avenue extension, liko sa wala ngadto sa S. Osmeña paingon ngadto sa ilang destinasyon sa SM City o sa North Bus Terminal.
Ang mga jeep pasaheroan gikan sa Urgello ug Private nga moagi sa dalan Benedicto paingon ngadto sa pier area kinahanglan nga moliko sa tuo ngadto sa General Maxilom Avenue extension, liko sa tuo ngadto sa S. Osmeña Avenue, unya balik sa ilang naandan nga rota paingon ngadto sa ilang point of origin.
Ang mga jeep pasaheroan gikan sa South Bus Terminal nga dunay rotang 02B anha paagion sa S. Osmeña Avenue, dayon liko sa wala ngadto sa T. Padilla extension, liko sa tuo ngadto sa dalan Benedicto, liko sa tuo ngadto sa General Maxilom Avenue extension, liko sa tuo ngadto sa MJ Cuenco Avenue paingon ngadto sa naandan nilang rota balik sa ilang point of origin. Ang designated nga parking area diha sa sementeryo sa Lorega San Miguel sa walang bahin sa General Echavez extension. Ang loading ug unloading area paingon sa sementeryo anha diha sa tuong bahin sa nahisgutang karsada.
Ang designated parking area sa sementeryo sa Carreta anha diha sa General Maxilom Avenue (diha sa kanhi Sacred Heart School), samtang ang loading ug unloading area anha duol sa gate sa maong sementeryo.
Sa Doña Pepang Cemetery, ang designated parking area anha diha sa MJ Cuenco Avenue sa walang bahin sa karsada paingon ngadto sa General Maxilom Avenue.
Ang loading ug unloading area anha diha sa tuong bahin sa dalan MJ Cuenco Avenue paingon ngadto sa General Maxilom Avenue. Sa Chinese Cemetery, ang designated parking area anha diha sa walang bahin sa karsada sa MJ Cuenco Avenue paingon ngadto sa Hipodromo ug ang loading ug unloading area anhan diha sa tuong bahin sa karsada duol sa gate sa Chinese Cemetery paingon ngadto sa Mactan road.
Sa Ludo ug Queen City Garden Cemetery, ang designated parking area anha diha sa tuong bahin sa karsada sa Don Andres Soriano Avenue paingon ngadto sa Juan Luna Avenue, dalan Gaisano, 6th Avenue ug West 1 Road North 6, samtang ang loading ug unloading area anha diha sa walang bahin sa karsada sa Andres Soriano Avenue paingon ngadto sa Juan Luna Avenue.
Ang mga motorista, driver ug uban pang mogamit sa karsada giawhag sa pagsunod sa traffic signs nga giinstolar sa mga apektadong karsada aron malikayan ang kahuot sa trapiko atol sa pagsaulog sa Kalag-kalag. - BANAT NEWS