CEBU, Philippines - “Taktakon gyud!” Mao kini ang gipasalig ni Kapitan Joe Navarro sa Barangay Punta Princesa kung mag-positibo sa confirmatory test ang siyam niya ka mga empleyado sa barangay kinsa nasutang positibo sa gihimong drug test.
Kahinumduman nga nag-positibo ang duha ka babaye ug pito ka mga lalake niya nga staff sa gihimong surprise drug test sa mga empleyado sa maong barangay sa miaging adlaw.
Suma pa ni Navarro nga 82 ka buok ang iyang mga empleyado ug wala niya igsapayan kung manaktak siya kung mapamatud-an silang mga adik. “Bahala’g ako na nga supporters, kung mag-positive na sila sa confirmatory test, taktakon gyud na nato. Igo ra man ta motuman sa balaod,” matud pa ni Navarro.
Ang nahisgutang operasyon gidumala sa Cebu City Office for Substance Abuse Prevention (COSAP) ug Philippine National Police Crime Laboratory.
Nagkanayon ang hepe sa COSAP nga si Joey Herera ang maong siyam ka empleyado ipaubos pa sa confirmatory test nga mahibaw-an napu ka adlaw gikan sa gihimong drug test. (BANAT NEWS)