CEBU, Philippines - Usa ka ginang ang gipusil patay sa duha ka mga lalaking gituohang drug pushers diha sa sitio Matumbo sa barangay Pusok sa dakbayan sa Lapulapu niadtong Sabado sa udto ug ang kalambigitan sa pagpamaligya og ginadiling drugas ang gitutukan karon sa imbestigasyon.
Ang biktima nga napusilan patay mao si Evelyn Sabandal, 33, nagpuyo sa maong dapit kinsa gipusil sa duha ka wala mailhing mga lalaki.
Matud pa ni SPO1 Allan Pantaleon sa Homicide Section sa Lapulapu City Police Office ang duha ka lalaki gikatahong miduol sa biktima ug nangutana kun namaligya ba kini og shabu tungod kay buot silang mopalit niini.
Sumala pa ni Pantaleon base sa imbestigasyon gitubag sa biktima ang duha nganong anha sila mopalit kaniya nga pulos man sila mamaligyaay niini.
Apan gikatahong nasuko ang mga gikatahapan sa tinubagan sa biktima ug kalit nga miibot og wala matinong kalibre sa armas dayong dul-it og pusil sa agtang sa maong ginang makausa ka higayon.
Human sa maong pagpusil daling mibiya ang maong duha ka lalaki pahilayo ug wala na maabti sa kapolisan nga mitubag sa maong alarma.
Hinuon si Pantaleon miingon nga usa sa mga gikatahapan ang nailhan nga adunay angga nga “Elong” tungod kay sa wala pa mahitabo ang krimen gilitok sa biktima ang pangalan sa usa sa mga gikatahapan. - BANAT NEWS