CEBU, Philippines - Lalaking pinangita sa dakbayan sa Lapulapu nadakpan sa bukirang bahin sa barangay Humagwan sa lungsod sa Argao niadtong Biyernes sa alas 10:20 sa gabii.
Ang nadakpan nga suspek mao si Reynaldo Nacilia, 38, lumad nga taga sitio Tawog barangay Taloot, Argao ug nalutsan og warrant of arrest sa kasong qualified theft sa dakbayan sa Lapulapu ug walay piyansang gitugot sa korte.
Si Regional Trial Court (RTC) branch 53 Lapulapu RTC Judge Wilfredo Navarro maoy nipirma sa warrant of arrest batok sa suspek.
Apan sila si SPO4 Esteban Abuera ug SPO1 Arnold Abenir sa Argao Police Station nakadawat og report nga didto motago ang suspek sa maong lugar hinungdan nga ilaha kining gipangita nianang pagkagabii.
Wala makabantay ang suspek kinsa padulong na nga matulog niadtong tungura gisignit dayun sa mga polis.
Kagahapong adlawa gitakdang i-turnover sa kapulisan sa Argao ngadto sa kapulisan sa dakbayan sa Lapulapu ang suspek. (BANATNEWS)