CEBU, Philippines - Dobleng kaguol ang gibati sa pamilya gawas nga namatyan gikawatan pa gyud sila sa limos nga usa ka gatus ka libo ka pesos diha sa ilang balay sa barangay Poblacion sa lungsod sa Argao niadtong Miyerkules sa alas 10:00 sa buntag.
Midangop ug nagpa-blotter sa kapulisan si Lucila Montañez, 64, taga Lamakan, Argao ug kabanay sa namatay nga si Rogelio Veloso Sr,. Usa sa mga mitambong sa haya ang ilang gitumbok nga mikawat sa maong salapi nga taga barangay Tulic, Argao.
Matud ni SPO1 Arnold Abenir, imbestigador sa Argao Police Station dihang nahinabi sa Banat News ang limos gikan sa kompanyang gitrabahoan sa anak nga babaye sa namatay.
Sumala pa nga ang 8-anyos nga bata maoy gitunolan sa sobreng gisudlan sa limos ug gipamalihog niini paghatud sa taas apan wala magtagad ang bata ug gibutang lang sa bangko ang sobre.
Tungod sa kadaghan sa mga tawo kay adlaw kadto sa paglubong sa ilang minatay uwahi na nilang nahinumdoman ang maong sobre apan dihang ilang gisubay wala na kini sa bata.
Ang usa sa ilang bisita nga ilang gidudahang maoy mikuha niini tungod kay kalit kining nawagtang. Ang suspek dihang giimbitar sa kapolisan gibuhian gihapon tungod kay walay makatumbok sa testigong siya gyud ang mikuha sa kwarta. - BANAT NEWS