CEBU, Philippines - Giklaro ni Cebu City Mayor Michael Rama nga gilakip gyud niya sa iyang 2012 budget proposal ang housing project sa siyudad nunot sa mga nanggawas nga estorya gikan sa mga kritiko nga sagad sa iyang programa pulos beautification project sa siyudad.
Depensa pa ni Rama nga iyang gibalanse ang iyang mga programa sunod tuig diin pipila niini naglangkob sa panglawas, livelihood program, pagpalambo sa drainage system ug uban pa.
Kahinumduman nga moabot ngadto sa kapin sa P11 bilyones ang target nga budget ni Rama sunod tuig, gisaysay sa mayor nga normal lang ang mga pagsaway apan dili siya magpaapekto niini gumikan kay igahin ra gyud niya ang iyang oras sa pagtrabaho.
Dugang pa niya nga ang pagtinabangay sa nagkadaiyang sektor maoy usa sa estilo sa iyang administrasyon aron matulin ang paghatag og serbisyo ngadto sa iyang mga konstituwente. (BANATNEWS)