CEBU, Philippines - Dako ang pagmahay ngadto sa ilang gobiyerno ang Kenyan national nga nakuhaan og tulo ka kilong illegal nga drugas sa Mactan Cebu International Airport gumikan sa walay pagpakabana kaniya sa kasong giatubang dinhi.
Matud pa ni Asha Apiano Uguto nagsagol ang iyang kaguol gumikan sa kakulang sa suporta sa iyang nasud nga wala mopadala og abogadong molaban kaniya sa iyang kaso.
Nabalaka usab siya sa pamilyang nabiyaan sa Kenya nunot sa iyang pagkasikop.
Sa milabay’ng adlaw gipahigayon ang presentasyon ug markings sa mga ebidensiya sa sala ni Lapulapu City RTC Branch 27 Hon. Executive Judge Toribio Quiwag apan si Atty. Rico Amores nga gihatag sa korte gihapon maoy milaban sa maong Kenyan.
Nabalaka usab si Uguto sa iyang duha ka mga anak ug mga ginikanan nga nahibilin sa Kenya diin siya lamang ang gisaligan sa ilang panginabuhi.
Samtang si Amores malaumon nga makalingkawas ra sa kasong giatubang si Uguto gumikan kay wala kini masinati sa balaod sa Pilipinas. Matud pa ni Amores tulo ka mga saksi nga gikan sa gawas sa nasud diin nagikan si Uguto ang moabot sa Sugbu aron sa pagpamatuod sa ka-inosente sa iyang kliyente.
Si Uguto misaysay ngadto kang Amores nga tulo ka lugar ang giagian sa iyang mga bagahe ug wala kini masayod kung adunay illegal nga drugas nga anaa sulod sa iyang bagahe.
Si Uguto nangangkong negosyante kini og mga panapton gikan sa Kenya. Gidakop siya human makuhai og tulo ka kilong shabu ug gidudahan sa mga sakop sa National Bureau of Investigation nga drug mule kini sa West African Drug Syndicate.
Karong Oktubre 27 himuon ang full blown hearing sa iyang kaso. (BANATNEWS)