CEBU, Philippines - Patay ang 20-anyos lalaki human gipusil gamit ang pugakhang sa iyang kaugalingong uyoan diha sa basketball court sa barangay Bagacay sa siyudad sa Toledo niadtong Miyerkules sa alas 7:00 sa gabii.
Ang biktima nga patay nang nadangat sa tambalanan mao si Baltazar Villacencio, 20, nagpuyo sa maong lugar samtang ang suspek mao ang iyang uyoan nga si Crisanto Villacencio, 42, nagpuyo usab sa maong dapit.
Matud ni PO2 Bombino Enriquez sa Toledo City Police Station dihang nahinabi sa Banat News ang biktima nag-estambay sa basketball court dihang kalit gipusil sa suspek.
Patay na kini pag-abot sa tambalanan sa dakbayan sa Sugbo.
Dugang nahipos nga impormasyon nga ang biktima gipasakaan og kaso sa suspek tungod sa pagpamato niini sa balay sa suspek pipila ka adlaw na ang nakalabay ug giingong adunay nakahulhog sa suspek nga mag-amping tungod kay may dautang tuyo ang biktima kaniya. Dihang nasigpatan sa suspek ang biktima sa basketball court giadto dayun niya kini ug gipusil og pugakhang.
Tungod sa nahitabo gisulong sa mga kabanay sa biktima ang balay sa suspek aron mobawos hinungdan nga miresponde ang barangay kapitan nga si Ramon Darodos ug gitabangan ang asawa ug duha ka mga anak sa suspek nga makaikyas ug gidala sila sa buhatan sa kapulisan hangtud kagahapong adlawa alang sa ilang siguridad.
Ang kapulisan padayun pa sa ilang manhunt operation sa nagtagotago nga suspek. (BANATNEWS)