CEBU, Philippines - Tulo ka polis sa Talisay Police Station padayong miatubang sa kasong Robbery-Extortion gumikan sa giingong pagpangilkil niini og kuwarta sa usa ka dinakpan nila bahin sa gidiling drugas.
Ang maong mga polis mao sila si PO2 Roy Sarsaba, PO3 Eric Enad ug P02 Martin Gerosin III.
Ang mga kihante nga sila si Elvincito Baguio ug Analopu Nacario sa ilang kiha ngadto sa Visayas Ombudsman nagkanayon nga niadtong Agosto 14, 2009, nagpahigayon og saturation drive ang mga suspetsado didto sa barangay Tangke, dakbayan sa Talisay.
Unya nadakpan nila si Maridel Obrero nga nagkupot og usa ka pakete nga shabu.
Unya matud pa ni Baguio nga gitawgan siya ni PO2 Sarsaba nga nangayo og P100,000 agi og bugti sa kagawasan ni Obrero
Apan iya kining gihangyo og P50,000 ug miuyon kuno ang maong polis.
Niadtong Agosto 17, sa maong tuig nagbinayranay na sila sa sulod sa sakyanan ni Sarsaba ug si PO3 Enad maoy miihap sa kuwarta.
Apan matud pa nakamatngon si PO2 Sarsaba sa presensya sa NBI hinungdan mipasirit kini og padagan sa iyang sakyanan ug wala hidakpi sa NBI,
Apan sa tubag sa suspek kini miingon nga ang tanang pasangil kanila pulos mga tumo-tumo. - Lesley caminade Vestil/EC (BANATNEWS)