CEBU, Philippines - Duha ang namatay tungod sa pagkalumos diha sa Butuanon River kagahapon ala-una sa hapon sumala pa sa Cebu City Disaster Risk Reduction Management Council (Cebu-CDRRMC).
Si Alvin Santillana, ang pangulo sa Cebu City Disaster Risk Reduction Council sa pagtawag sa Banat News mibutyag nga patay na ang duha dihang nadala sa mga sakop sa Emergency Rescue Unit Foundation diha sa North General Hospital sa barangay Talamban.
Sa nakuhang impormasyon sa Banat News gikan ni Winston Nugra, ang communication dispatcher sa CCDRRMC ang nakalas base usab sa ilang nakuhang impormasyon sa Talamban Police Station mao sila si Adelaida Velasquez, 50, ug apo niining si Henry Velasquez, 4, pulos residente sa sitio Pulangbato Proper sa barangay Pulangbato ning dakbayan.
Sumala pa nga ang bata maoy unang natagak sa lim-aw sa sapa ug pagkakita sa apohan milayat kini sa tubig aron unta kini luwason apan naapil kini og kalumos. Si Lorna Miñoza, ang barangay secretary sa barangay Pulangbato ning dakbayan sa pakighinabi sa Banat News sa telepono mibutyag nga wala magbaha ug wala sad mag-ulan niadtong tungura sa ilang lugar sa pagkahitabo.
Wala hinuoy klarong nakahatag og impormasyon kung nag-unsa ang duha sa maong sapa apan si Miñoza nagdudang posibleng nanglaba ang apohan sa bata ug naabot sa lawom ang naulahi ug nalumos.
Matud pang Miñoza adunay pipila ka mga bahin sa maong sapa ang giingong gipundohan og tubig ilabi na sa mga lim-aw nga lawom kumparar sa ubang bahin niini.
Matud pa ni Miñoza nga ang bata maoy unang milutaw maong naalarma ang mga residente pagkakita niini hinungdan nga nanawag sila og mga sakop sa ERUF ug gilusad dayon ang search and rescue effort inabagan sa mga sakop sa ERUF. (BANATNEWS)