CEBU, Philippines - Saulogon sa Nobiyembre 13 -20, 2011 ang Drug Abuse and Prevention and Control Week dinhi sa Sugbo ug tibuok Central Visayas uban sa tema nga “Mahalin ang Kalikasan Ingatan ang Kalusugan, Druga ay Iwasan”.
Si kanhi Dangerous Drugs Board DDB Undersecretary Paul Clarence Oaminal sayo nga mipahibawo niini aron makapangandam ang mga local nga kagamhanan sa gitakdang kalihukan.
Nunot niini gi-awhag usab ni Oaminal ang mga Non Government Organization (NGO) nga moduyog ning maong kalihukan aron labi pang molig-on ang kampanya batok sa gidiling drugas.
Gihagit usab ni Oaminal ang mga opisyal sa local nga kagamhanan sa pagkab-ot og mga lig-on nga programa nga haom sa kampanya pagsumpo sa suliran sa drugas.
Miingon si Oaminal nga gikalipay niya ang katukoran sa Anti Drug Abuse Commission sa probinsya sa Sugbo nga makapalig-on sa kampanya batok ning nagkagrabi nga suliran sa drugas dinhi sa lalawigan.
Usa sa gisugyot ni Oaminal mao ang pagsagop sa drug rehabilitation center aron makurehian kadtong nagumon sa dautang bisyo.
Naglaraw usab siya nga makigtagbo kang Gobernador Gwendolyn Garcia aron hangyoon kini nga maoy mangulo sa kampanya batok sa gidiling drugas dinhi sa Visayas Area. (Darrel A. Carumba/WC) (BANAT)