CEBU, Philippines - Usa ka psychologist ang miingon nga posibleng wala mag ‘nervous breakdown’ ang suspek sa masaker nga si Emmanuel Ponce, 55, paghimo niini sa krimen sanglit nakahatag pa siya og kamandoan sa iyang 14-anyos nga anak aron kini pagawason.
Si Dr. Rene Obra, pangulo sa Don Vicente Sotto Memorial Medical Center for Behavorial Sciences nagkanayon nga si Emmanuel niadtong tungura naa gyud sa hustong panghuna-huna tungod kay nakahimo pa kini og hustong desisyon sama sa pagpagawas sa iyang kamanghurang anak.
Nagduda hinuon siya ang nahimong pabilo sa pagpatay niini mao ang ‘depression’ ug ang ‘rejection’ sa iyang pamilya kaniya sukad nga wala na siya tagda samtang wala na magtrabaho isip usa ka seaman.
“Bati ba kay mura og sa dihang seaman pa siya maayo kaayo iyang pamilya unya karon labay-labayan na lang siya,” matud pa ni Obra sa interbyu sa sibyaanang DyHP kagahapon.
Si Emmanuel, giingong bugtong anak sa iyang mga ginikanan mipusil sa iyang asawang si Melinda, 53; mga anak nga sila si Elaine Grace, 26, ug Heather Joy, 25 , ug Emlin, 18, sulod sa ilang balay sa Palm View Village, Barangay Tabunok, Talisay City. Lakip sa gipatay ang katabang nilang si Anastacion Deniega, 30.
Si Superintendent Rex Derilo, ang hepe sa Firearms Explosives Security Service Agency and Guards Supervisory (FESSAGS), nagkanayon nga lisensyado ang pistola ni Emmanuel nga gigamit sa krimen.
Si Obra nagkanayon nga kung atol sa pagkahitabo nakainom si Emmanuel posibleng mao kini nakapainit kaniya kay posibleng nag-delusional kini nianang mga tungura ug lisod pasabton.
Dugang pagduda ni Obra nga posibleng nakadugang usab ang pagbaton niini og armas aron mabuhat ang krimen maong dihang iyaha gyud silang napusilan, nakaamgo kining patay na ang iyang pamilya maong nagpusil nalang sad siya sa iyang kaugalingon.
Di makatuo
Samtang pulos dili makatuo sa gidangatan sa maong pamilya ang ilang mga kabanay nga nangabot kagahapon diha sa Saint Peters Funeral Homes sa Lorega-San Miguel sa dakbayan sa Sugbu.
Kagahapon, wala mosud-ong sa haya sa amahan ang 14-anyos nga survivor ug didto ra kini mitan-aw sa inahang si Melinda Ponce samtang giabagan ang bata sa mga iyaan sulod sa Saint Matthew Chapel sa Saint Peters Funeral Homes sa barangay Lorega San Miguel ning siyudad.
Ang bata giubanan usab sa mga social worker sa Department of Social Worker and Development (DSWD).
Si Merison Dela Cerna nga taga lungsod sa Badian ug ig-agaw sa suspek nga naghikog nga si Emmanuel Ponce nagkanayon nga layo ra kaayo ang posibilidad nga pinansyal ang hinungdan sa nahitabo ug na-shock sila sa nahitabo.
Gibutyag hinuon ni Dela Cerna nga sigun sa iyang nahibaw-an, gipasagdahan nalang ni Melinda ang iyang ig-agaw kun asa kini malipay sukad nga nadisgrasya kini sa barko nga gisakyan didto sa gawas sa nasud.
Matud niya nga kaniadto nag-away away ang magtiayon ug gani misangpot gyud sa pagpanapat sa iyang ig-agaw ngadto kang Melinda.
Asa ilubong?
Si Thelma Villones, laing ig-agaw sa pamilyang Ponce nagkanayon nga adto dad-on si Emmanuel sa balay sa ig-agaw niini diha sa Tabunok samtang ilang gikasabotan nga dad-on sa mga kabanay si Melinda ug ang mga anak didto sa Bicol apan ilang agdon ang desisyon sa 14-anyos nga bata.
Samtang usa ka opisyal barangay Tabunok nga suod nga higala ni Emmanuel nagkanayon sa mga tigbalita nga sukad nga wala na mosakay sa barko ang naulahi tungod sa pagkadisgrasya nahimo na kining seloso, daling masuko ug manapat sa asawa.
Kini usab ang gituohan sa maong opisyal sa hinungdan nganong dili na maayo ang relasyon sa mga anak ngadto sa suspek ilabi na tungod sa pagpanapat niini ngadto sa ilang inahan ug dihay higayon nga nasukmagan sa 18-anyos nga anak lalaki si Emmanuel. (Uban sa report nila ni Lesley Caminade ug Rey Pasaporte/EIM) (BANATNEWS)