CEBU, Philippines - Nagpatabang sa kagamhanan sa siyudad sa Sugbo ang Nagkahiusang Drivers Alang sa Reporma (Andar) aron matabangan ang mga drayber sa 21B nga jeepneys gikan sa Mandaue aron sila tugutang makasulod sa Ayala Center Cebu terminal.
Si Romeo Armamento, ang presidente sa Andar midangop sa City Hall aron magpatabang nga mahangyo ang mga tagdumala sa Ayala Center Cebu nga tugotang makaagi ang mga 21B jeepney sa terminal sa maong mall.
Matud pa niini nga sa pagkakaron wala sila tuguting makasulod sa maong terminal hinungdan nga dunay mga pasaherong gikan sa Mandaue nga dili nalang mamilite gumikan kay wala sila mahatud sa mall.
Hinuon kung dili gyud mahangyo ang maong mall mihangyo sila sa siyudad nga palahuson unta ang ilang rota sa Citilink Terminal.
Si Atty. Rafael Yap sa City Traffic Operations Management misaysay nga maglisod sila og himo og lakang kalabot sa problema sa mga jeepneys nga wala tuguting makasulod sa Ayala terminals sanglit usa kini ka pribadong establisamento.
Tun-an pa hinuon nila ang hangyong palahuson sila ngadto sa Citilink Terminal sanglit usa sa ilang gilantaw ang posibleng pagsaka sa volume sa sakyanan nga moagi sa siyudad kung pasudlan og dugang jeepney gikan sa laing dapit nga moresulta sa kahuot sa dagan sa trapiko. - (BANAT NEWS)