CEBU, Philippines - Mikabat og P57 mil ang nadawat sa usa ka inahan kinsa benepisyaryo sa PCIC Accident Dismemberment Security Scheme Program (PCIC ADSSP) ni Governor Gwendolyn Garcia.
Si Vicenta Calma, hingkod, minyo, nga taga barangay Langtad, lungsod sa Argao nakadawat sa maong pasiguro human mamatay sa aksidente ang anak niini nga si Nestor Calma nga maoy membro sa PCIC ADSSP for Agri-Fishery sa gobernador.
Tulo ka mga tseke ang gitunol sa gobernador uban sa Presidente sa PCIC nga si manlalaban Jovy Bernabe ngadto kang Calma nga naglangkob sa P50 mil isip accident insurance; P5 mil isip medical reimbursement ug P2 mil alang sa burial aid niini.
Si Calma mapalasa-maton kaayo ngadto sa gobernador gumikan sa maong hinabang nga napahimuslan niya ingon man sa tanang mga kabus ug timawa ning lalawigan.
Samtang sa pikas bahin giawhag usab nila ni Dr. Mary Rose Vincoy, hepe sa Provincial Veterinarian ug Dr. Necias Vincoy Jr., hepe sa Provincial Agriculture sa lalawigan sa Sugbo ang mga mag-uuma ug mananagat nga namuhi og mga hayop ingon man adunay mga tanom sa pagsalmot sa maong programa sa gobernador aron usab sila may kasiguroan sa umaabot nga panahon. - BANAT NEWS