CEBU, Philippines - Kritikal ang kahimtang sa usa ka 28 anyos nga ulitawo human kini dunggaba sa iyang barkada didto sa barangay Valladolid sa dakbayan sa Carcar niadtong Biyernes sa alas 9:30 sa gabii.
Ang biktima nga padayon pang giatiman sa mga doktor mao si Godi Sagolili, 28, ulitawo, nga taga Sitio Ramos, barangay Valladolid, samtang ang suspek mao si Jemuel Racho, hingkod ug silingan sa biktima.
Si SPO4 Rosendo Benondo sa Carcar City Police Station mibutyag sa Banat News nga ang biktima ug ang suspek nagkalalis samtang nag- estoryahay sila sa dalan.
Unya ang biktima maoy nanukmod og una sa suspek ug dihang nainit ang naulahi mibunot kini sa iyang dalang icepick ug gihansakan ang biktima nga maayong pagkaigo sa tuong bahin sa dughan.
Dihang misirit na ang dugo gikan sa lawas sa biktima, mikaratel kini og dagan pahilayo sa maong lugar .
Ang mga estambay kinsa nakasaksi sa hitabo maoy mihatod sa biktima ngadto sa Carcar City District Hospital apan gi-transfer kini sa tambalanan sa dakbayan sa Sugbo tungod sa katalandugon sa kahimtang niini. Samtang ang kapulisan padayon pang nangita karon sa suspek. (BANATNEWS)