CEBU, Philippines - “Ate, Kuya ayaw laina inyong huna-huna, dili mi mga dautan ug dili mi kawatan manaygonay lang mi…okay..here we go.”
Kini maoy kasagarang madunggan sa pasahero niining mga bata ug mga batan-ong manakay sa mga jeepneys aron manaygon.
Ang mga batang manaygonay dili kaayo makapabalaka sa mga pasahero apan sa mga bayong-bayong nga ‘hugaw’ ug daw mga esnatser ang panagway makapahadlok sa mga tawo bisan paman nga nananghid silang manaygon.
Aduna pay uban kanilang balikason ang mga pasahero kay wa mohatag ug ang uban manghudlat pa nga daw namahad.
Si Senior Superintendent Melvin Ramon Buenafe kaniadto pa miingon nga aduna gyud sila’y responsibilidad sa kabataan apan dili ang kapolisan maoy nag-unang ahensya pag-atiman sa maong problema.
Matud pa ni Buenafe nga dili sila makapanakop sa mga manaygonay nga menor de edad tungod kay walay balaod nga gipasa nga naghisgot sa susamang gimbuhaton.
Samtang si Chief Inspector Julius Ompad, legal counsel sa Cebu Provincial Police Office ug kanhi nadestino sa Mabolo Police Station sulod sa 11 ka tuig mibutyag nga nakapanakop na sila og mga menor de edad apan nabuhian ra usab kini ubos sa desisyon sa Department of Social Welfare and Development.
Sa interview sa The Freeman kang city social welfare and services Catherine Yso, iyang giawhag ang publiko sa dili paghatag og kwarta sa mga manaygonay kini aron dili sila magsalig nga daling pangitaon ang kwarta.
Matud pa ni Yso nga mipahigayon na sila og monitoring kalabot sa mga manaygonay sa Sugbo inubanan sa taga Cebu City Anti-Mendicancy Task Force. (BANATNEWS)