CEBU, Philippines - Milanat na og hapit usa ka bulan nga walay klarong klase ug kun duna man kanunay kining maputol tungod sa mga tinun-ang giingong sudlan og dautang espiritu diha sa Sta. Lucia National High School sa barangay Sta. Lucia sa lungsod sa Asturias.
Ang labing grabeng insidente nahitabo niadtong Lunes diin lima ka mga tinun-an sa 3rd year ang giingong kalit gisudlan og dautang espiritu nga maoy nakapagubot ug nakaputol sa klase.
Gibutyag ni Genesis Legaray ang presidente sa Parents and Teachers Association (PTA) dihang nahinabi sa Banat News upat sa maong mga tinun-an ang nakuyapan ug ang usa ka babaye nga maoy na grabihan giingong nausab ang tingog ug isog kaayu.
Ang maong tinun-an gidala sa Mary’s Little Children sa dakbayan sa Talisay ug didto gipatambalan.
Dugang ni Legaray nga tulo na ka semanang madisturbo ang klase sa maong tunghaan tungod sa maong mga hitabo.
Kagahapong adlawa, si Msgr. Fredirick Krekimbeck sa Mary’s Little Children sa Talisay maoy mipahigayon og Santos nga Misa ug mipakompisal sa mga tinun-an sa maong tunghaan.
Samtang gibutyag ni kagawad Edmund Toto Maglasang sa barangay Antipolo, Tuburan nga sikbit ra nga barangay nitataw nga gikan pa niadtong nilabay’ng buwan sa Septiyembre kanunay maputol ang klase sa iyang duha ka anak nga nagtungha sa 3rd year high school tungod sa maong mga hitabo. Ang prinsipal sa maong tunghaan nga si Dennis Bacon gisuwayan unta pag-kontak sa Banat News apan pakyas ang maong tinguha.
Si Maglasang miingon nga nagsugod ang pagkadisturbo sa mga tinun-an sa dautang espiritu human gipamutol ang mga dagkung kahoy nga mangga ug gemelina palibot sa tunghaan nga naigo sa pagkoral.
Si Department of Eduation (DEP-ED-7) regional director Dr. Recaredo Borgonia dihang nahinabi sa Banat News miingon nga nakadawat na siya og report kabahin sa maong hitabo ug mipasusi na niini. (BANATNEWS)