CEBU, Philippines - Upat ka mga sakop sa gang nga gipasanginlang tulisan nga magsakay og motorsiklo ang nasikop sa kapulisan sa dakbayan sa Sugbu niadtong miaging gabii didto sa dakbayan sa Danao.
Ang mga sakop sa Theft and Robbery Section (TRS) sa Cebu City Police Office (CCPO) gipangulohan ni Insp. Rolando Pinili mihimo’g follow-up operation human ang motorsiklong gisakyan sa mga tulisan natiman-an sa mga biktima niadtong Domingo diha sa Gochan St . , eskina F. Cabahug sa barangay Mabolo.
Ang upat nga nangasikop giila sa kapulisan nga mao sila si Edmund Flores, 22, taga Guinacot, Danao, John Ryle Yane, 18, taga Sandayong Danao, ug ang duha ka menor de edad nga nagpangidaron 17 ug 14-anyos nga taga Sandayong ug Highway Looc Danao City.
Nakuha gikan kanila ang kolor pulang motorsiklong XRM nagtangag sa plakang 9968YA, usa ka .22 paltik rebolber nga dunay tulo ka buhing bala ug .38 rebolber nga may upat ka buhing bala ug upat ka cellphone nga gipanag-iya sa ilang gipangbiktima.
Si Sr. Supt. Melvin Ramon Buenafe, hepe sa CCPO nga nahinabi sa mga tigbalita nagkanayon nga ang mga suspek duna pay laing duha ka kauban nga gituohang ilang mga lider nga sila si Jonesto Caraat alyas Joni Alejandro ug Adriano Batiquin Noya nga taga Guinsay Danao.
Sila si Caraat ug Batiquin maoy gipasanginlang responsable sa sunod-sunod nga tulis dinhi sa dakbayan, Carmen, Compostela ug siyudad sa Danao uban sa upat ka mga batan-on.
Apan upat ka mga batan-on pulos mihimakak sa mga insidente sa tulis sa dakbayan sa Sugbu bugtong nilang giangkon nga nakapanulis na sila sa dakbayan sa Danao.
Niadtong Oktobre 9 ang managsuong sila si Claire ug Cherryl Las Piñas gitulis sa duha ka lalaking nagmotor diha sa Mabolo ug ilang natiman-an ang plate number sa motorsiklo.
Si Insp. Pinili, hepe sa TRS nagkanayon nga ilang gisusi sa Land Transportation Office (LTO) ang tag-iya sa motorsiklo ug ilang nahibaw-an nga usa ka Edwin Mangas nga taga Poblacion Danao ang tag-iya niini. Nasuta nga gipaabangan niya kini kang Caraat isip habalhabal ug wala siya makahibawong gigamit kini sa pagpanulis. Ug Monna Mae Romero (BANAT NEWS)