CEBU, Philippines - Nunot sa gikahadlukang hulga sa pagbaha nga wala mahinayon tungod sa bagyong Ramon kagahapon, 73 ka pamilya ang gipugos pagpabakwit gikan sa ilang gipuy-an duol sa Mahiga Creek sa barangay Subangdako ug sa ubang sapa sa dakbayan sa Mandaue.
Ang Mandaue City Disaster Risk Reduction Management Council nabalaka sa kaluwasan sa mga residente duol sa Mahiga Creek hinungdan nga ila silang gipabakwit sa ilang tagsatagsa ka panimalay.
Si Mandaue City acting mayor Glenn Bercede, nagkanayon 45 ka pamilya gikan sa sitio Gothong, Back Innodata ug sitio Mahayahay sa barangay Subangdako ang gibutang sa evacuation center sa San Roque Parish Gym.
Samtang 13 ka pamilya gikan sa sitio Oril sa barangay Banilad ang gipahimutang sa Banilad Elementary School ug 15 ka pamilya gikan sa sitio Sapasapa sa barangay Subangdako ang gipahimutang sa Subangdako Elementary School.
Kini human sa walay hunong nga pag-ulan ug giingong namatikdang misaka ang tubig sa Mahiga Creek ug sa ubang sapa hinungdan nga ilang gipugos sa pagpahiklin ang maong mga residente ilabi na ang mga tiguwang, kababayen-an ug kabataan.
Ang dakbayan mipadala na og mga sakop nga miatiman sa mga gipabakwit alang sa mga pagkaon ug tambal.
Niadtong adlaw’ng Martes gipaubos sa state of calamity ang dakbayan sa Mandaue gumikan sa baha nga nasinati niini sa halos tanang barangay sa dakbayan sa Mandaue niadtong milabay’ng semana. Bong Soriano ug Romeo Limpangog/EIM (BANAT NEWS)