CEBU, Philippines - Usa ka estudyante nga graduating sa kolehiyo kinsa gituohang giurom wala nay kinabuhi nga napalgan sulod sa iyang lawak didto sa Sitio Datag, Brgy. Maribago dakbayan sa Lapulapu sa milabay’ng udto.
Ang namatay mao si Anaclito Estioco, 22, ulitawo, lumad nga taga Samar, kasamtangang nagpuyo sa maong dapit ug usa ka graduating student sa HRM sa University of Cebu Banilad.
Sa imbestigasyon nga gihimo sa kapolisan sa Lapulapu nasayran ang mipahibawo kanila sa maong hitabo mao si Brenda Lepelimer, boardmate ni Estioco sa mga alas 11:45 sa milabay’ng udto diin siya maoy unang nakasaksi sa nahitabo ni Estioco.
Kini tungod matud pa ni Lepelimer nga nahibulong siya nga wala pa mobangon si Estioco sa maong higayon nga unta tag-sayo man kini momata.
Tungod niini mibati siya og kabalaka hinungdan nga gituktok niya ang pultahan sa lawak ni Estioco.
Apan tungod kay walay miabli, gipugos niya pagtud ang pultahan sa lawak ug dihang naabli kini maoy iyang nakita sa Estioco nga nagbuy-od sa iyang kama nga wala nay kinabuhi hinungdan nga nangayo siya og tabang sa ilang mga silingan.
Si Estioco kinsa gituohang giurom, gisakwat dayon sa mga sakop sa ERUF ug gihatod sa tambalanan diin didto kini ideklarar nga dead on arrival sa mga mananambal.
Mimando ang kapolisan sa mga kabanay ni Estioco nga ipaubos kini sa autopsy. - BANAT NEWS