CEBU, Philippines - Naangol ang guwardiya sa Mandaue City Central School human kini mabuthi sa iyang kargadang armas nga natagak sa yuta samtang siya nag-roving sulod sa compound sa eskuylahan sa barangay Centro, dakbayan sa Mandaue sa miaging tungang gabii.
Ang biktima mao si Romnick Morales, 22, ulitawo nga taga barangay Basak, dakbayan sa Lapulapu ug security guard sa tulunghaan sa gobiyerno sa dalan Catalino U. Ouano sa barangay Centro.
Si PO1 Earl Fomador sa kapolisan sa Presino 1 sa Centro Police Station sa Mandaue City Police Office (MCPO) miingon nga nag-roving sa sulod sa campus sa maong tulunghaan ang biktima dihang kalit lang natagak ang gitangkil niyang kalibre .38 nga revolver ug miboto. Si PO1 Fomador miingon nga ang usa ka bala didto motaroy sa tuong bukton niini.
Dali siyang gihatod ngadto sa Mandaue City Hospital sa iyang mga kauban aron kini matambalan.
Matud pa ni PO1 Fomador nga mohimo pa sila og dugang pakisusi sa pagsuta kun tinuod ba nga natagak sa yuta ang armas sa maong guwardiya nga maoy nakaingon sa pagkaangol niini. - BANAT NEWS