CEBU, Philippines - Lima ang angol usa niini kritikal sa dinasmagay sa duha ka motorsiklo didto sa Poblacion sa siyudad sa Carcar niadtong Lunes sa alas 10:20 sa gabii.
Ang nagdinasmagay mao ang mga motorsiklo nga gimaneho ni Helgen Pansit, 21, nga taga Upper Lamakan barangay Valladolid uban sa iyang angkas nga si Vincent Languido, 24, ulitawo, nga silingan ni Pansit, ug ang motorsiklo ni James Randy Mangubat, 16 , way lisensiya uban sa angkas niini ang iyang igsoon nga si Ailyn Grace Mangubat, 17 anyos ug ig-agaw nga si Ana Lucia Mangubat ,19, dalaga, nga pulos taga barangay Liboron, Carcar.
Si SPO2 Meliton Agadier, team leader sa mga polis nga miresponde sa maong hitabo mibutyag sa Banat News nga ang sakyanang gimaneho ni Pansit nagpaingon sa barangay Awayan, gikan sa Poblacion, Rotunda sa maong dakbayan dihang pag-abot niini sa dapit nga nahitaboan kalit lang milabang ang motorsiklo nga gimaneho ni Mangubat gikan sa usa ka barangay road.
Gumikan sa kakalit pulos wala makakontrolar ang mga drayber sa gidala nilang motorsiklo ug nagkadinasmagay sila.
Sa kakusog sa maong dasmag nangalagpot ang tanang nagsakay sa duha ka motorsiklo lakip na ang mga drayber niini ug pulos mitugpa sa sementadong karsada kansang mga ulo nangabunal ug ang ilang mga lawas nahiagom sa mga bun-og.
Apan si Languido , maoy nagrabihan pag-ayo gumikan sa kadako sa samad niini sa ulo ug gidali ang tanan sa pagdala ngadto sa Carcar District Hospital. Hinuon ang duha ka drayber kinsa gagmay ra og bun-og sa lawas gipagawas dayon sa hospital apan gikustodiya sila sa kapolisan ilabi na ang 16 anyos nga drayber nga walay lisensya sa pagmaneho.(WC)(BANAT NEWS)