CEBU, Philippines - Patay ang usa ka drayber sa habal-habal samtang laing usa ang anaa sa kritikal nga kahimtang human magkadinasmagay ang duha ka nagkasugat nga motorsiklo sa sitio Tal-ot, barangay Valencia siyudad sa Carcar niadtong Domingo sa alas 8:00 sa gabii.
Ang namatay sa tambalanan mao ang drayber sa Honda XRM 125 nga si Reynaldo Malilong, molupyo sa sitio Dapdap Poblacion 3 Carcar.
Samtang ang iyang gikadinasmagay mao si Miguelito Genario Lauron, nagpuyo gihapon sa maong lugar nga nagmaneho usab og laing motorsiklo.
Matud ni SPO1 Eduardo Bagol, traffic investigator sa Carcar City Police Station dihang nahinabi sa Banat News si Malilong gikan sa sitio Tal-ot samtang si Genario gikan sa sitio Awayan, Poblacion.
Pag-abot sa nahisgutang lugar nagkadinasmagay ang duha ug tungod sa kakusog nangalabay ang duha ka drayber ug mitugpa sa aspaltadong karsada.
Ang mga estambay sa maong lugar ug tanod maoy mitabang sa duha ug gihatud dayun sa Carcar City District Hospital apan si Malilong gideklarar nga dead on arrival.
Samtang si Genario gibalhin og tambalanan dinhi sa dakbayan sa Sugbo tungod kay seryuso usab ang kahimtang niini, ang kapolisan nagsusi pa kung kinsa sa duha ang sad-an. (BANATNEWS)