CEBU, Philippines - Miabot na kagahapon ang suspek sa pagdagit ug pagpatay sa 6-anyos nga si Ellah Joy Pique niadtong Pebrero ning tuiga human sa pagtago-tago gikan nalutsan og warrant of arrest nga nadakpan sa National Bureau of Investigation niadtong Biyernes sa hapon sa SM Megamall sa Ortigas sa Mandaluyong City.
Si Santos kinsa miabot na kagahapon sa hapon gikan sa kaulohan nadakpan sa National Bureau of Investigation niadtong Biyernes sa hapon sa SM Megamall sa Ortigas sa Mandaluyong City.
Matud pa ni Gov. Gwendolyn Garcia nga ang paghatag sa reward money ipaagi sa hustong proseso sama sa pagsigurong mao ba gyud kini ang nakahatag og hustong impormasyon nga nakapadakop ni Santos .
Ang inahan ni Santos daan nang nagdudang gi-traydor sa kauban ang iyang anak. Si Sr. Supt. Patrocinio Comendador ang direktor sa Cebu Provincial Police Office ug tigpamaba sa Task Force Ellah Joy Pique daan nang namahayag nga posibleng adunay matintal sa reward money sa mga kabanay ni Santos ug maoy mohatag kanila og impormasyon.
Apan pipila kabanay ni Santos sa interbyu sa TV Patrol Central Visayas kagahapon kusganong mihimakak nga sila maoy mitraydor sa suspek, apan may mibutyag nga konsensya nalang nila kung si kinsa man ang mitraydor niini.
Ang P300 mil niini gikan sa Kapitolyo samtang ang P50 mil gikan sa giamot-amotan sa kapolisan.
“ I thank God, the long arm of the law finally caught up Bella Ruby. I am very thankful Bella Ruby finally been arrested, we commend the NBI personnel particularly Arnel Pura of Cebu . We live in a society governed by laws and the law must prevail in order to secure justice,” matud pa ni Garcia.
Gipaabot pa usab ang kalamboan sa gihimong imbestigasyon sa International Police (Interpol) kalabot sa Briton nga ikaduhang suspek nga si Charles Ian Griffiths nga hinigugma usab ni Santos.
Sa laing bahin, supak ang mga kabanay ni Santos nga sa Cebu Provincial Detention Rehabilitation Center (CPDRC) kini bilanggoon, butang nga gisupak usab sa mga ginikanan ug kabanay sa biktima.
Si Capitol Security Consultant Sr. Supt Cesar Veloso mibutyag usab nga walay angayan nga kabalak-an ang kabanay ni Santos sa CPDRC tungod kay gibuwag ang babaye ug lalaking inmates.
Ang kampo ni Santos misang-at kagahapon og motion for reconsideration for the omnibus motion sa buhatan ni RTC-Branch 6 Judge Ester Veloso aron i-reconsider ug i-reverse ang omnibus order niadtong October 3, 2011 ug i-recall ang arrest warrant ni Santos kay kun dili miawhag silang mo-inhibit ang maong korte paghusay sa maong kaso.
Matud pa sa kampo ni Santos nga ang korte dili makadeklarar og mosyon nga ‘moot and academic’ tungod kay misang-at sila sa mosyon alas 3:12 niadtong Oktubre 3 samtang milusot ang warrant of arrest niana nang alas 3:30 sa hapon.
“It would be physically impossible, therefore for the accused to contest an Order finding probable cause, which it has not yet received when she filed Omnibus Motion,” tipik sa mosyon.
Samtang sa pakighinabi sa Banat News kang Atty. Rameses Villagonzalo ang abogado ni Santos, mibutyag kini nga kun ma-dismiss ang kaso ni Santos tungod sa ilang mosyon dili na sila mosang-at og motion to bail.
Pipila sa mga kabanay ni Santos nagpaabot kaniya diha sa buhatan sa NBI ug nagsuot og puti nga may printang “Bella & Ian are INOCENT.”
Samtang si Sr. Supt. Louie Oppus, Deputy Regional Director for Operation (DRDO) sa Police Regional Office-7 miingon nga ang pagkasikop ni Santos kalampusan sa law enforcement sa rehiyon.
Samtang si Atty. Inocencio Dela Cerna sa Criminal Investigation and Detection Group (CIDG)-7 ug abogado sa Task Force Ellah Joy Pique nagkanayon nga ilang babagan ang bisan unsang lakang nga himuon sa depensa alang sa temporaryong kagawasan ni Santos. (EIM) (BANATNEWS)