CEBU, Philippines - Estriktuhon pag-usab sa kapolisan ang hustong pagsuot sa mga uniporme sa mga polis human daghan na usab mga polis ang mo-duty nga dili mag-uniporme subay sa kamandoan sa Camp Crame sa ipatumang ‘Tamang Bihis.’
Kagahapon si Sr. Supt. Louie Oppus, Deputy Regional Director for Operation (DRDO) sa Police Regional Office-7 mipatawag sa mga city directors sa Metro Cebu ug ang hepe sa Operations lakip sa tanang hepe sa mga police stations aron mahimangnuan nga ipatuman ang ‘Tamang Bihis.’
Matud ni Oppus nga kinahanglan i-implementar tanang hepe sa kapulisan ang programa sa bag-ong regional director nga si Chief Supt. Marcelo Garbo.
Kagahapon mihimakak si Oppus nga iyahang gipang kasab-an ang mga chief of police atol sa pagpatawag niya og tigom kay ang iyaha lang mao ang pagpadangat sa sentimento ni Garbo nga kinahanglan tumanon ang hustong pagsuot og uniporme.
Samtang si Sr. Supt. Melvin Ramon Buenafe, director sa Cebu City Police Office (CCPO) nagkanayon sa Banat News nga ang ‘Tamang Bihis’ nagagikan kini sa kaugalingon sa matag pulis kay ilaha na kining gitudlo sa pagsugod palang sa training ang pagsul-ob og tarong nga uniporme sa police.
Apan giklaro ni Buenafe nga dili kalikayan nga dunay mga pulis nga gahi gyud og ulo hinungdan nga nabantayan na kini sa ilang mga labaw.
Si Buenafe mibahad nga may silot sa di motuman niini nga maisip nga nagpabadlong sa organisasyon sa PNP.
Sa iyang bahin si Sr. Supt. Anthony Obenza, director sa Lapulapu City Police Office (LCPO) miingon nga duna gyuy mahimong kalapasan ang usa ka polis nga mo-duty og dili magsul-ob og uniporme. (EIM) (BANATNEWS)