CEBU, Philippines - Kasong sexual harassment ang gisang-at kagahapon sa usa ka aplikante sa pagka-policewoman ngadto sa Commission on Human Rights (CHR)-7 batok sa usa ka doctor sa Regional Health Services (RHS) sa Philippine National Police (PNP).
Ang biktima gitago lang sa ngalang Mira (di tinuod nga ngalan) 26, usa ka gradwado ug lisensyadong Medical Technologist (Medtech).
Sa iyang reklamo iyang gisaysay nga mi-apply siya sa pagka policewoman sa Cebu City Police Office (CCPO) sa milabay nga buwan.
Unya gipaubos siya sa physical ug mental examination sa RHS sa Camp Sotero Cabahug, apan mitug-an siya sa taga media nga nakugang nalang siya kay atol sa maong eksaminasyon usa ka lalaking doctor ang mi-eksamin kaniya.
Nagkanayon ang kihante nga gibati siya og kahasol sa maong higayon kay isip usa ka medtech nasayod siya nga kinahanglan untang babaye nga doktor ang mohiling kanilang mga babaye.
Tungod sa iyang kasinatian mipasaka siya og reklamo ngadto sa CHR sa kasong sexual harassment batok sa maong doktor kansang ngalan gipugngan pa sa pagkakaron.
Si Primo Cadampog, CHR investigator nga nahinabi sa mga tigbalita mitataw nga ila nang nadawat ang reklamo sa maong aplikante ug ilang nakita ang manual diin nasulat gyud nga adunay general physical examination ang tanang mga aplikante sa pagka polis.
Sumala sa CHR nga nakasabot sila sa posibling kauwaw sa maong aplikanteng babaye sa iyang nasinatian ug katungod niini ang pagpasaka og reklamo sa ilang buhatan. (BANATNEWS)